Greenpeace denuncia l'apertón urbanísticu sobre la costa asturiana

La organización ecoloxista Greenpeace presentó ayeri la edición 2006 del informe añal "Destrucción a toda costa. Informe sobre la situación del litoral español" nel que denuncia que va doblase la cantidá de viviendes que se contaba con construyir na costa española. No tocante a Asturies, la organización conseña nel informe 12 puntos negros na nuestra costa ente los que rescampla'l casu de Llanes, onde Greenpeace afirma que s'escosó en namás 2 años el suelu acutáu pa construyir nel últimu plan Xeneral d'Ordenación, que tenía 8 años de vixencia, y onde tan proyectaes 15.000 viviendes más, les mesmes qu'habitantes tien el conceyu. Greenpeace recueye tamién la denuncia de l'asociación de vecinos llanisva Avall, qu'informó de supuestes rellaciones ente familiares de l'alcaldesa y una de les empreses promotores. Otros conceyos tamién tán nuna dinámica asemeyada anque a distinta escala, como sedrí'a'l casu de Muros de Nalón, con 2.000 viviendes nueves en proyectu y una población de 2.000 habitantes.

L'informe diz testualmente que "paez que'l lladrillu manda les decisiones de munchos conceyos asturianos" y asegura que "l'asaltu de les promotores inmobiliaries a
Asturies ye yá una realidá a la qu'hai qu'enfrentase". Ello ye que Greenpeace asitia en 40.000 el númberu de viviendes que van construyise na costa asturiana, unes viviendes que xunto colos 17 campos de golf previstos pa la nuestra costa, suponen ún de los afoguines constructores más acusaos de tol estáu. La corrupción y les irregularidaes llegales van venceyaes a esta xuba de l'actividá constructora na costa asturiana, espeyando l'informe de Greenpeace un total de 17 sentencies xudiciales nesti sentíu n'Asturies del total de 100 que se rexistraron en toa España, siendo que namás Valencia y Andalucía pasaron a Asturies en númberu de casos d'investigación abiertos por irregularidaes urbanístiques.


L'informe afonda nes dobles vares de midir que consiente la llexislación, como sedría'l casu de dimposiciones llegales que-yos permiten a los conceyos cobrar cantidaes de dineru por proyectos urrbanísticos qu'entovía nun tan autorizaos o'l fechu de que'l plan del litoral asturianu prohiba construyir nos primeros 500 metros decosta pero sí permita la presencia nellos de campos de golf tres de los que s'asitien les urbanizaciones.

Descargar equí l'informe en formatu PDF