Greenpeace califica la incineradora de Serín de “marcha atrás”

El conseyeru de Mediu Ambiente Francisco González Buendía dio anuncia de que'l cartafueyu de condiciones alministratives y técniques de la incineradora de Serín va salir nel mes de mayu. Mientres, al coru d'opiniones contraries a la planta, qu'axunta cuasimente a tol ecoloxismu asturianu, amestóse ayeri la de Greenpeace. La mayor organización ecoloxista del mundu dixo que la incineradora abultába-y una marcha atrás y que la incineración ye una solución "desfasada".

El comunicáu de Greenpeace califica'l proyectu como un "retrocesu na xestión de residuos n'Asturies" y nelli la organización recuerda que'l debate sobre la incineradora "yá se desarrollare va diez años y colos mesmos protagonistes actuales". Greenpeace diz que "la incineradora ye tan problemática agora como va una década" polo que-y abulta que "nun tien xacíu" que se plantegue la so puesta en marcha. Greenpeace quier dir asina contra'l viaxe que tan faciendo autoridaes asturianes y representantes d'asociaciones de vecinos a Francia y Austria pa visitar otres plantes incineradores y defende que en cuenta de la incineración, qu'amás ye contaminante, ye preciso potenciar la xestión de residuos afalando'l reemplegu, el recicláu o'l compostáu de materia orgánico.

Otres organizaciones que yá criticaron delles vegaes la incineradora, casu de la Coordinadora Ecoloxista asturiana, afonden nes sos argumentaciones y nieguen otros argumentos colo que les autoridaes tan estos díes defendiendo la incineradora. Ello ye que mientres se defende que de la incineración pue consiguise enerxía eléctrica, dende la Coordinadora Ecoloxista afirmen que la corriente que vaya sacase d'ello "ye de risa".