Greenpeace asoleya la mala calidá del agua nos ríos asturianos

La famosa organización internacional presentó esta selmana el "informe agua", un documentu nel qu'analicen la situación del agua nes distintes cuenques del Estáu español. L'informe rescampla, polo que-y toca a la Cuenca hidrográfica del Norte, a la que pertenez Asturies, que namás 11% del agua de los ríos y el 16% del agua de manantial tan en condiciones de cumplir colos oxetivos qu'apauta la Directiva Marcu del Agua, un documentu oficial de la unión europea pol que tien de mandase la política d'agües de tolos estaos miembros de la UE dende l'añu 2004 y que tien de cumplise obligatoriamente d'equí al añu 2015. Esta Directiva ye un intentu por recuperar la calidá del agua continental en toa Europa, abandonando la política de construcción de grandes infraestructures.

La construcción de munches de les grandes infraestructures que se contemplen dientro del Plan Hidrolóxicu Nacional ye ún de los puntos que menos-y presten a Greenpeace, que ve innecesaries infraestructures como la que se plantea pa Caliao, pero amás de falar d'embalses y saltos, la contaminación que causen les industries nos ríos ye otu de los puntos negros que detecta la organización nesti informe. La idea de que en trancando la minería los ríos asturianos diben recuperar tola so riqueza queda d'esta manera en suspenso, detectándose casos de contaminación graves na ría d'Avilés y nos polígonos industriales na vega del Nalón a l'altura de Llangréu, pero nun ye la industria la única enemiga de la pureza del agua.

Un millón d'asturianos tamos cada día empuercando y malgastando agua. Nesti sentíu, otru de los oxetivos en qu'afila la crítica la organización ye na falta d'infraestructures de saneamientu, una carencia agravada pol aumentu del turismu que va provocar que gran cantidá de xente faiga usu de los recursos d'agua del país, hasta'l puntu d'entornar l'equilibriu d'usos del agua n'Asturies. Asina, según Greenpeace, si agora'l 44% del agua que consumimos n'Asturies ye pa usos agrícoles, un 32% pa les industries y centrales térmiques y el 26% pal consumu humanu nes ciudaes, esti repartu va cambiar, y muncho, d'equí en pocos años, pudiendo llegar el consumu urbanu y rellacionau con recursos turísticos hasta igualar polo menos el consumu que tien agora la industria. Elementos como los campos de golf van tener muncha influencia nello, y ye qu'un campu de golf consume, por términu mediu, 700.000 metros cúbicos d'agua al añu, o lo que ye lo mesmo, tanto como una villa de 15.000 habitantes. La organización condenó'l fechu de que les autoridaes de la Confederación hidrográfica del Norte nun dispongan de datos sobre l'estáu de los recursos d'agua subterráneos, como ye la so obligación, según rescampló Greenpeace na presentación del informe.