Grau convoca un concursu-oposición pa cubrir la plaza de téunicu del SNL con Candamu

El plazu pa presentase fina'l llunes.

El Conceyu de Grau convocó un concursu-oposición a la plaza de téunicu del Serviciu de Normalización Llingüística de Grau y Candamu, de media xornada como personal llaboral con una retribución bruta añal de 12.478,90 euros. Según espliquen les bases, la duración de la contratación va tar condicionada pola subvención concedida pol Gobiernu pa financiar el serviciu y va crease una bolsa de trabayu.

El SNL de Grau y Candamu echó a andar nel 2017 con Miguel Rodríguez Monteavaro como responsable, que dexó la plaza a últimos del añu pasáu, siendo sustituyíu por Rebeca San Martín. Agora'l puestu de téunicu torna a quedar llibre, pudiendo presentase hasta'l llunes a esti concursu-oposición tolos interesaos que cumplan colos requisitos.