Granda de romería

La parroquia xixonesa de Granda celebra les sos fiestes, y pa ello que meyor qu'una nueche folk el domingu.

Dende va unos años les fiestes de Granda incluyen nel so programa una nueche folk el domingu,, día nel qu'acaba los cuatro díes de fiesta. Per esta nueche folk ya tien pasao xente como "Nuberu", "Kepa Junkera" o "Tejedor" como actuaciones principales.

Esti añu'l programa del domingu entama a les 19:30 col tamién yá tradicional festival. Nél van participar la "Banda de Gaites Xiranda" y el grupu de baille "Trebolgu", les dos formaciones d'Uviéu y estrechos collaboradores unos de los otros. Amás tamién va tar el grupu de baille de Xixón "Trebeyu" y la banda de gaites bretona "Cercle Celtique de Espezet".

A eso de les 21:30 entama la nueche folk con tres grupos. "Cuerria" van ser los encargaos d'abrir la nueche, darréu de los piloñetos los avilesinos "Triba", y pa zarrar la nueche d'una romería xixonesa que meyor qu'un grupu de Xixón como son "Felpeyu", que yá tan faciendo les maletes pa participar na edición d'aguaño del Festival Intercélticu de Lorient.

Esta nueche folk ye una de les que mayor aceptación algamó en pocos años. Un espaciu tan prestosu como la Carbayera de Granda, una bona selección de grupos, y incluyir esti conciertu como una actividá más del programa de fiestes de la parroquia son les claves d'ésitu d'esta convocatoria.