Gran victoria del Farho Xixón Baloncestu nun partíu perdifícil

Nun final d´infartu'l Farho Xixón baloncestu llogró una victoria que ye perimportante pal equipu xixonés, pues afítalu nel octavu puestu y dientro de los “play-off” d'ascensu.

Hai de destacar l´aciertu nos segundos finales del partíu, faltaben ocho, cuando Josep Pacreu, dende la llínia de tiros llibres, metió cuatro puntos de dos personales que-y ficieron.
El partíu entamó con una gran igualdá nel marcador, con empates y pequeñes diferencies, hasta qu´un triple de Chus Poves punxo un 18-14 nel lletrónicu. Un robu de balón de Vallmajó a Sergio Sánchez fizo que`l resultáu fuere de 20-14. Dempués una canasta de Pacreu con personal y tiru amestáu punxo un 22-14 a lo cabero del primer cuartu. Nesti final de cuartu`l Farho Xixón Baloncestu fizo un gran xuegu y un parcial de 7-0 al C. B. Ciudad de Huelva.


Nel segundu cuartu l'equipu local atascóse y namás llogró facer ocho puntos, anque`l entamu, con una canasta xixonesa, ponía la másima separtación nel marcador con un 24-14. Dempués les personales de los xugadores locales y la zona que pusiere en práutica l´Huelva ficieron que nos ocho primeros minutos el Farho Xixón Baloncestu llograse namás que cinco puntos. Foi nesi cuartu cuando'l xugador foriatu, Sergio Sánchez, entamó a castigar l'aru xixonés, con nueve puntos na primera parte y 19 na segunda. Al descansu llegóse con un 30-31 favoratible a los andaluces.


Nel tercer cuartu'l Farho Xixón Baloncestu entonóse y siempres foi per delantre nel marcador. Hai de destacar una canasta de Poves sobre`l tiempu de posesión cuando faltaben trés minutos venticinco segundos pa finar. A diecisiete segundos pal final Pover perdió un balón, pero un gran tapón de Waleskowski, dexó`l resultáu nun 48-44 pa los locales.
Nel caberu cuartu una canasta con tiru amestáu d´Ortega, que fizo un gran partíu, punxo un 51-44, pero darréu Young, nun mal día pa él, fizo la cuarta personal. Dempués un triple de Vallmajó, dos tapones seguíos de Lledó y Pacreu y una personal de Morón con técnica, punxo un resultáu de 57-47 cuando faltaben cinco minutos y cuarenta y nueve segundos, pero los erros y el desnortiamientu de los xugadores locales, amás del llabor de Sergio Sánchez, que s´echó l´equipu al llombu, llevólos a face-y un parcial de 9-0 al Xixón, poniéndose a un puntu, 57-56.

Faltando dos minutos y ún segundu Young fizo la quinta personal.
Dempués un intercambiu de canastes fizo que se llegara a un 63-62, con un triple de Sergio Sánchez, cuando faltaben ocho segundos trés décimes. Foi entós cuando apaeció Pacreu y la so seguridá nel llanzamientu de personales poniendo un 67-64 final, anque l´Huelva entá tuvo un ataque, con cuatro segundos trés décimes, pa empatar el partíu, pero l´equipu xixonés tuvo mui atentu y acertáu en defensa.


Nel cuadru local destacó'l llabor de Keith Waleskowski (10 puntos y 20 rebotes, 15 d´ellos defensivos), Xavi Vallmajó (16 puntos y 4 asistencies), Josep Pacreu (14 puntos, 6 triples de 7 intentos y 8 faltes personales recibíes) y Josep Ortega que, coles faltes personales de Young, xugó munchos minutos y bien, faciendo 9 puntos y 7 rebotes. Nos aspeutos negativos alcontramos les perdes de balón, que foron 21, y los erros nel tiru, con un 49% nel tiru de dos puntos y un 29% nel de trés.
Nel Club B. Ciudad de Huelva Sergio Sánchez foi'l meyor (28 puntos, 6 recuperaciones y 8 faltes personales recibíes). Tamién destacó Marvin Stone con 9 puntos y15 rebotes.

Allinaciones:

Farho Xixón Baloncestu: Xavi Vallmajó (16), Chus Poves (10), Josep Pacreu (14), Keith Waleskowski (10) y Tim Young (2). Tamién xugaron: Josep Ortega (9), Jorge Lledó (3), Saúl Blanco (2) y Rubén Suárez (1).

C. B. Ciudad de Huelva: Sergio Sánchez (28), Isaac López (5), Jon Kortaberría (5), Ugonna Onyekwe (6) Marvin Stone (9). Tamién xugaron: Juan C. Liñán, Javier Alvarado (9), Antonio Morón (4) y Miguel A. Beltrán.

Parciales per cuartos: 22-14, 8-17; 18-13; 19-20. Arbitraron el partíu los señores Oscar Bardají y Carlos Avilés.

Foron eliminaos por cinco faltes personales Tim Young nel equipu local y Isaac López nel C. B. Ciudad de Huelva. Asistieron al Palaciu de Deportes de La Guía 2.100 persones