Gran ésitu de les nueches d'Avilés

Les nueches folk del vienres y el sábadu n'Avilés contaron con actuaciones de gran nivel y ambiente.

. Esti fin de selmana vieno la traca final del Intercélticu coles principales actuaciones de los asturianos "Llan de Cubel" y los irlandeses "Lúnasa". El vienres de nueche los cubelos demostraron que siguen teniendo un directo perfectamente trabayao, y incluso pudimos sentir dalgún cantar del nuevu repertoriu que tien que llenar el so próximo cd, nel que tan trabayando intensamente. Tamién el sábadu tpela nueche había muncho públicu y espectación na Plaza del Conceyu d'Avilés. La xente qu'ellí taba tenía muncha gana de sentir los dos conciertos qu'había pa esa nueche, "N'Arba" y los esperaos "Lúnasa". Los primeros demostraron que tienen cuerda abondo nos escenarios, y de la mesma manera que "Llan de Cubel", tamién tocaron dalgún tema que nun ta incluyíu nel so cd, colo qu'albidramos la posibilidá de que pa esti añu podamos tener nuevu discu de la banda de Xosé Ambás.

Darréu de los asturianos xubieron al escenariu los irlandeses "Lúnasa", que xunta "N'Arba", convocaron a bien de públicu na plaza avilesina. Ellí taben munchos aficionaos al folk y bien de músicos de grupos asturianos que queríen ver a una banda de referencia nel panorama internacional. "Lúnasa" nun podía defraudar y nun lo fizo, repasaron los temes del so últimu discu "The Kinnitty Sesions" amás de facer dalguna incursión nel anterior "Redwood". Al públicu quedo-y claro la grandísima calidá técnica de los músicos, que conectaron rápidamente cola xente. Ayudó muncho pa esta conexón la simpatía del célebre flauteru de la banda, Kevin Crawford, que nun paró d'enredar col públicu de les primeres fileres y incluso paró pa tomar dalgún culín que-y apurrién d'abaxo. En resume, yera imperdonable que n'Asturies nun pudiéramos ver tovía a una banda de la calidá que pudimos ver el sábadu, y que nos dexa con más gana de sentir a más grupos de fuera o asturianos que tengan la fuercia de "Lúnasa" nel escenariu.