Graciano García, Patronu d'Honor de Caveda y Nava

La Fundación Caveda y Nava nomará esti añu Patronu d'Honor al periodista Graciano García, conocíu por ser fundador de la revista Asturias Semanal y director de la Fundación Príncipe d'Asturies dende la so fundación hasta'l 2009.

Nuna nota prensa, la entidad recordó que "Graciano García, periodista de profesión, fundó nos años setenta la revista Asturias Semanal", onde empezó aparecer la sección 'Conceyu Bable' "que tanta importancia tuvo a la hora de da-y un nuevu puxu a la normalización del asturianu".
  
"Tiempu depués, yá  como responsable de la Fundación Príncipe, Graciano García punxo'l nuestru país nel mapa internacional y acertó a la hora de prestixar institucionalmente elementos tan simbólicos de la nuestra identidá como l'himnu", añade.

Asina, la nota esplica que "col so nomamientu como Patronu d'Honor pretendemos reconocer estos méritos y contar cola so complicidá pa qu'esi camín de prestixu insititucional incluya tamién al nuestru idioma".
  
La xornada va celebrase en Villaviciosa el próximu 20 de payares. A les doce y media fairáse ante la casa natal de Caveda l'avezáu homenaxe floral. Dempués, na sede de la Fundación Cardín daráse acoyida al nuevu Patronu d'Honor.
  
Inaciu Iglesias dexa la Presidencia
Pela so parte, el presidente de la Fundación Caveda y Nava, Inaciu Iglesias anunció qu'ésti será'l so últimu añu nel cargu.
 
"Llevo cuatro temporaes y tengo que recalcar que foi pa mi un honor poder continuar el llabor de Jose Luis Atienza y Telvino González al frente d'esta institución", señala. Iglesias considera que realizó'l trabayu "lo meyor que fue quién". En pasando esta VIII Xornada, entamará'l procesu electoral.