Google, baxo sospecha

Los internautes empiecen a ponese roceanos col buscador más potente de la rede, y tan acabante de nominalu al premiu "Gran Hermano" contra la privacidá de datos. Naide nun conocía a Google de la que nació va cinco años, pero en pocu tiempu, la eficacia del motor de búsqueda americanu acabó por baltiar a tola competencia incluyíos los grandes buscadores d'aquella, como Altavista o Yahoo. Estos son portales qu'amás de buscador teníen otros servicios adicionales como corréu o noticies, mientres que Google namás yera qu'un buscador, pero un buscador que tenía rempuesta pa too.

El casu ye que, amás de responder a lo que-y entruguemos con ablayante precisión, Google tamién guarda pa elli les entrugues que-y faigamos. Google enxerta nel nuestru ordenador una "cookie" pa saber quien somos y amás guardanos la IP pa saber que direcciones visitamos. En consecuencia Google tien datos pa poder mandanos propaganda a midida o hasta pa coses menos inocentes. Al dicir de los responsables de Google Watch, sitiu que se dedica a controlar l'actividá de Google, si el buscador "guarda copia" de tolo que-y entrugamos, entós sabe qué intereses tenemos y pue facese una idea de como pensamos. Según Google Watch, el buscador pue controlanos hasta'l 2.038.

Pa les empreses y sitios que necesiten que se-yos vea bien na rede, el monopoliu de Google ye un problema más real y más inmediatu. Como los internautes ye difícil que miren más p'allá de la primer fueya de resultaos que devuelve'l Google, salir ente los diez primeros ye el too o la nada. Google ofrez la posibilidá de pagar por anunciase en buscador, pero ye que la manera que tien de clasificar les páxines el programa del buscador yá dexa fuera a muncha competencia. El sistema pol que s'ordenen les páxines en Google llámase PageRank, y empondera el valor de un web en base al tráficu que mueve y en base a los enllaces qu'apunten pa elli. D'esta manera los webs más visitaos y más grandes tienen a cada actualización del buscador meyor posición, porque los que menos tienen van quedando más p'abaxo. Ún de los trucos pa conxurar esto ye facer "link farms", páxines vacies enllenes d'enllaces
que manden pal sitiu que quier promocionase o sitios que se promocionen ún al otru, pero Google suel decatase del engañu.