Gonzalo Tapia resucita la pantasma de Los Victorero

El Festival de Cine de
Xixón presenta mañana como remate a les proyecciones del "Día d'Asturies" una de les películes asturianes
más interesantes de les que van poder vese nesta edición del
certame: Los Victorero, memoria de una familia un documental de cerca d'una hora que ye obra del asturianu Gonzalo Tapia,
director que tuvo l'honor de ser el primeru en facer un curtiu de cine
n'asturianu (Xicu'l Toperu, 1993)



En Los Victorero, memoria de una familia el director salda una delda cola
infancia al retratar la vida d'una familia enforma influyente nel Llastres de
la primera metada del sieglu XX. Al traviés de les películes en 8
mm que rodó nos años 50 Antonio Victorero y del testimoniu de la
xente que los trató y conoció, Tapia convídanos,
según les sos propies pallabres, a viaxar a un pasáu que, anque
entovía ta recién, ta cásique escaecíu, retratando
nel documental una Asturies pobre nuna España franquista, un ermu nel
qu'esta familia d'industriales construyó "un mundu austeru, célibe y
moxigatu, qu'ellos mesmos retrataron como una Arcadia feliz". Nel
sieglu XX, los Victorero, que desapaecieron nos 70, foron de los últimos esponentes del
paternalismu católicu del XIX, un sistema de rellación ente
obrereu y patronu que daquella yá taba fuera de tiempu y de llugar.



Gonzalo Tapia reconoz que'l viaxe al mundu de los Victorero que
propón ye personal y subxetivu a la fuerza, y tampoco nun niega que nel
documental hai un aquello de xuiciu cola historia y l'alcordanza d'una familia
que "nun convirtió tola so llucidez nun compromisu cola so xente
y el so tiempu". La rellación personal de Tapia colos Victorero
ye estrencha, y ye que pa elli los hermanos Victorero son personaxes colos que
se crió. Tapia alcuérdase de como en casa d'elli se contaben
histories y bilordios sobre ellos, y incluso la güela del director, Pilar
Victorero Isla, yera pariente d'ellos y el güelu, Gonzalo Tapia Seoane,
tuvo munchu tratu con ellos por ser el médicu de la familia.



El director diz que'l documental "quier ser una evocación
de la pantasma d'una familia erma y del tiempu en que vivieron". Y ye
que'l mundu de los Victorero da pa disparar el maxín. Poques coses
llamaríen más l'atención del rapaz que yera Tapia que
contemplar la decadencia d'una familia de caciques, trés hermanos y
trés hermanes, solteros los seyes y ensin quien heredare la gran fortuna
de la que yeren amos, rexentando una empresa conservera en que llegó a
trabayar mediu pueblu. Pero la fascinación pol mundu de los Victorero
tresciende la figura del solterón o l'encantu de la riqueza que
remanaben. Dientro del mundu peslláu en que vivíen, los Victorero
gastaron l'inxeniu en discurrir inventos qu'agora paecen tan anacrónicos
como ellos mesmos, casu de la máquina "Victoria" para liar
tabacu o un Belén con un xuegu de lluces que foi la sensación

d'una navidá que lleva criando mofu d'entós p'acá. La cita
con Gonzalo Tapiaye na sesión de les 10 y cuartu de la nueche na sala 5 de los Cines Centro de
Xixón, anque les proyecciones del "Día d'Asturies" entamen a les 19:45h nesta mesma sala colos curtios a competición.