González: "Ye una mala noticia qu'Ana Pastor seya nomada presidenta de la Cámara"

El diputáu de Podemos criticó que la nueva responsable de dirixir el Congresu “lleva enforma tiempu engañando” a los asturianos colos plazos de la Variante de Payares.

Tres la sesión constituyente del Congresu de los Diputaos esti martes en Madrid, el diputáu de Podemos por Asturies, Segundu González, llamentó que la exministra de Fomentu, Ana Pastor, fuese nomada presidenta de la Cámara, gracies al sofitu de Ciudadanos, formación a la que tamién enfeó la so actitú.

En declaraciones a los medios a la salida del Congresu, González aseguró llamentar el nomamientu de Pastor y manifestó que “ye una permala noticia” pa la vida parlamentaria. Amás, aseguró que la exministra de Fomentu “lleva munchu tiempu engañando” a los asturianos colos plazos de finalización d'infraestructures básiques como la Variante de Payares”.

Les sos crítiques nun quedaron ehí y el diputáu de Podemos echó en cara a Pastor el fechu de que na pasada llexislatura “refugó hasta en once veces, en cuatro meses, comparecer” ante la Cámara pa rindir cuentes “sobre temes fundamentales pa Asturies”, como por casu, los retrasos na finalización de les obres de l'A-63, el Plan de Víes de Xixón o la mentada Variante de Payares.

Per otru llau, González criticó a Ciudadanos por escaecese y renegar les sos promeses de cambéu y rexeneración, por dos sillones na Mesa del Congresu”. Amás alvirtió que dende Podemos van siguir “trabayando al serviciu de la xente por que'l trabayu parlamentariu que llevemos alantre sía nuesa meyor credencial por que la ciudadanía otorgar la enfotu necesariu pa gobernar nel futuru”.