González Riaño reclama a los partíos que falen yá “sobre la oficialidá qu’Asturies demanda y necesita”

|
Xosé Antón González Riaño nel XLII Día de les Lletres Asturienes

“Ésti tien que ser l’últimu Día de les Lletres Asturianes ensin oficialidá”, reclamó Xosé Antón González Riaño nel so discursu institucional na Xunta Estraordinaria de l'Academia de la Llingua Asturiana (ALLA) nel Teatru Campoamor. El presidente pidió a los partíos políticos “que faléis ente vós, agora, ensin más perda de tiempu, sobre la oficialidá qu’Asturies, constitucionalmente, demanda y necesita”.

Con un formatu más cenciellu, obligaos pola situación sanitaria, l’actu académicu pol Día de les Lletres Asturianes, na so cuarentena segunda edición, tornó al Campoamor con una amplia presencia d’autoridaes, rescamplando l’asistencia del presidente del país, Adrián Barbón, y de representantes de tolos grupos parllamentarios a esceición de VOX. Distancia ente butaques, xel hidroalchólico na puerta y controles a la entrada y a la salida marcaron la vuelta al solemne teatru uvieín.

Nun hebo l’accesu d’académicos d’años últimos pel pasillu central del patiu de butaques col públicu sentáu, sinón qu’entraron per un llateral del escenariu sentándose en sielles colocaes pa guardar la distancia de seguranza. Sonia Avellaneda, nesta ocasión ensin l’acompañamientu de Próspero Morán, presentó l’actu, qu’abrió’l coru Cantos del Fontán, dirixíu por Rebeca Velasco, colos versos de Manuel Asur en ‘Romance d’una llingua’ que musicalizó Dixebra con ‘La danza’.

El secretariu de l’ALLA, Xosé Ramón Iglesias Cueva, lleó les actes de la xunta estraordinaria d’abril na que se decidió nomar a Xandru Martino académicu correspondiente y a Pilar Rubiera académica d’honor. Escritor y periodista, que recibieren de manera previa al actu una insinia, sintieron el ciñu del públicu y lleeron los sos discursos enantes del esperáu de González Riaño.

La pandemia tuvo mui presente, al igual que nel Día de les Lletres del añu pasáu, celebráu n’ochobre nel Aula Magna del Edificiu Históricu de la Universidá d’Uviéu, nes pallabres del presidente. “Dende l’Academia queremos treslladar a toles families que sufrieron y tán sufriendo los dañibles efeutos del COVID la nuesa más fonda solidaridá. Somos sabedores del dolor, individual y social, qu’esta pandemia xenera y sabémoslo porque tenemos a seres queríos superando la gafura o, lo que ye peor, que doliosamente nun fueron a superala”, principió.

“Nesti momentu nun hai xera más importante que combatir el COVID, d’ehí que sofitemos y valoremos el llabor del Gobiernu d’Asturies y de toles fuerces polítiques y sociales nesti tarrén”, siguió González Riaño enantes de referise a los académicos nuevos. “Axunta una bayura de méritos esceicionales como escritor, como investigador, como entamador de proyeutos culturales y como anovador de la llingua na so rellación coles actuales teunoloxíes de la comunicación”, dixo sobre Martino”, una figura que representa un encontu “enorme” pa la institución, “como lo ye tamién la emoción cola que lu acoyemos”.

No que respeuta a Rubiera, apuntó que “ye la meyor amuesa d’un facer periodísticu carauterizáu pola veracidá y el rigor”, una “referencia informativa nel ámbitu de la cultura asturiana”. “La so voz rescampla a lo llargo’l tiempu con un enclín oxetivu, independiente, feminista… La llingua asturiana beneficióse d’esti enclín y l’Academia de la Llingua Asturiana siempres tuvo nella’l meyor encontu pa proyeutar socialmente’l so mensax”, añadió.

Estudiu sociollingüísticu del Navia-Eo y diccionariu

Lo siguiente foi l’habitual repás al llabor académicu nos meses últimos. Ente los munchos trabayos citaos ta l’avance del Diccionariu Etimolóxicu de la Llingua Asturiana de García Arias, “espublizáu en coedición cola Universidá d’Uviéu y qu’esperamos ver peracabáu a lo cabero’l branu”, pero la llingua del Navia-Eo llevó’l mayor protagonismu.

“Prestaríanos falar, mui en particular, de dous proyectos que nos abultan estratéxicos dafeito dende úa perspectiva cultural, referidos os dous al territorio máis occidental d’Asturias: el Diccionario Eonaniego y el Estudio Sociollingüístico del Navia-Eo”, rescampló nesi idioma. Sobre la primer iniciativa señaló qu’hai “un importante trabayo preliminar adelantao qu’ha facilitar estraordinariamente esta xeira”, mentes que con respeuto al segundu avanzó que “cuntamos xa con un diseño técnico que vai permitir llograr datos definitivos este mesmo ano”.

Na parte final del discursu refirióse a la función tutelar de la institución en política llingüística, citando “aconceyamientos, regulares y granibles, col Gobiernu del Principáu d’Asturies y tamién, al máximu nivel, con representantes de los grupos políticos FSA-PSOE, PP, Podemos, Cs, IX y Foro-Asturies. En tolos casos nun clima de respetu y de diálogu francu qu’agradecemos y que ye’l que necesita la dignificación de la llingua asturiana”.

A esos mesmos partíos pidió-yos, “en nome del pueblu asturianu, que faléis ente vós, agora, ensin más perda de tiempu, sobre la oficialidá qu’Asturies, constitucionalmente, demanda y necesita”. Pero enantes recordó a los presentes los dos grandes fechos de los meses últimos, esto ye, l’encamientu del Congresu al Gobiernu “pa que faiga vidable la previsión constitucional d’oficialidá de les llingües d’Asturies” y la sentencia del Tribunal Constitucional en rellación col usu del asturianu na Xunta Xeneral “non tanto porque afita la constitucionalidá de la norma parllamentaria, sinón porque amuesa, una vegada más, que l’usu efeutivu y oficial de la llingua namái pue garantizase pente medies d’una reforma estatutaria qu’asina lo recueya”.

“Y ye que lo que se fai equí nun tien l’encax constitucional nin ye homologable a la solución algamada poles ciudadaníes gallega, vasca, navarra, catalana, valenciana, balear o aranesa”, siguió, dalgo que fai pensar que “nun ye posible que toos tean enquivocaos y nós non. Asturies nun meyoró, nin social nin económicamente, por nun valorar con procuru la nuesa riqueza llingüística a lo llargo de los caberos cuarenta años. Ye irracional dir a la escontra d’esa realidá y ye insostenible pretender xustificar que nes otres comunidaes billingües sí se tien que cumplir la Constitución y n’Asturies non”.

Mayoría parllamentaria

“Sabemos qu’hai anguaño una amplia mayoría parllamentaria favoratible a la oficialidá, reflexu de la mayoría social, pero l’Academia tamién persabe que’l meyor futuru pa la llingua esixe los mayores consensos y la necesidá de que naide que sienta a Asturies quede al marxe de los pautos”, destacó darréu. Nesi sen, punxo a disposición de toles formaciones la institución, que “lleva tola so existencia reflexonando sobre’l marcu xurídicu d’oficialización del asturianu. Sabemos cómo formulalu, qué estructura organizativa se requier, qué fases de puesta en práutica se necesiten, qué inversión habría que facer y cuánto d’ello podría revertir social y económicamente”.

Pa finar, reclamó que “ésti tien que ser l’últimu Día de les Lletres Asturianes ensin oficialidá. Dientro d’un añu tenemos que tar equí, otra vuelta, festexando tar llibres de la pandemia y cola llibertá llingüística qu’afita una oficialidá llograda ente toes y toos”.

Contador Estadistiques