González Riaño llama a un alcuerdu ente Gobiernu y PP, al que-y pide concretar “qué oficialidá” necesita

Adrián Barbón y Álvaro Queipo siguieron ente’l públicu’l discursu de Xosé Antón González Riaño na xunta estraordinaria de l’Academia de la Llingua Asturiana (ALLA) pol XLV Día de les Lletres Asturianes. El presidente de la institución tamién encamentó al Executivu a entainar col Plan de Normalización: “Entama a espardese’l nerviosismu”, aseguró.

Pela puerta central d’accesu al patiu de butaques xubieron un añu más los académicos al escenariu del uvieín Teatru Campoamor. Xunto a ellos nesta ocasión, los dos académicos de númberu nuevos Claudia Elena Menéndez Fernández y Pablo Rodríguez Medina, asina como la d’honor, la suiza Éva Büchi, que foron los primeros n’intervenir depués de la llectura de les actes por parte del secretariu Xosé Ramón Iglesias Cueva. Sonia Avellaneda y Próspero Morán exercieron un añu más como maestros de ceremonies.

El momentu más esperáu yera’l discursu de González Riaño qu’arrancó, como nun podía ser d’otra manera, con unes pallabres pa Conceyu Bable. “Güei ye’l Día de les Lletres Asturianes, pero nun ye un Día de les Lletres más. Porque esti añu, xustamente, festexamos los cincuenta de l’apaición de Conceyu Bable”, afirmó.

“Asturies nun sedría lo mesmo (social, cultural y políticamente) ensin les aportaciones de Conceyu Bable. Porque Conceyu representó, nel tardofranquismu, la primer demanda de dignificación llingüística y cultural p’Asturies, pero tamién la esixencia de les llibertaes democrátiques y el llogru de l’autonomía política del País. Nesti sen, l’Academia considérase, a tolos efeutos, heriede de los enfotos de Conceyu Bable”, rescampló’l presidente de la institución, que recordó a aquellos que yá nun tán con nós, como “Teresa, Urbano, Andrés, Pin, Fernanda, Quilo… A toos ellos y elles el nuesu más sentíu homenax y la más fonda de les reconocencies”.

Darréu tendría pallabres pa los académicos nuevos. Sobre los de númberu apuntó que “son mozos, bien mozos, pero con una trayeutoria y un puxu que nun almiten duldes. A Claudia pidímos-y que siga nel mesmu sen, faciendo les sos aportaciones filolóxiques col máximu rigor y proponiendo nueves llinies d’estudiu pa la institución. A Pablo demandámos-y que siga escribiendo la meyor lliteratura, pero tamién, como profesor y especialista, que contribuya al afondamientu de los estudios lliterarios que lleva alantre la institución”.

No que respeuta a la d’honor, dixo que “Éva ye un perbón exemplu (científicu y, al empar, éticu) d’investigadora que pa meyor entender los fenómenos léxicos de la romanística tien en cuenta les aportaciones d’una llingua que, siendo minoritaria como l’asturianu, ufre posibilidaes de primer nivel a la hora d’interpretar filolóxicamente la realidá europea”. “A ella encamentámos-y que siga siendo la meyor embaxadora, nel contestu internacional, del llabor científicu y normativizador que se ta llevando alantre n’Asturies en rellación cola nuesa llingua histórica”, rellató.

DEN y Congresu Mundial de Cultura Asturiana

Los siguientes minutos dedicaríalos a repasar la xera académica del añu, recordando los contautos “col Gobiernu del Principáu d’Asturies y coles fuerces polítiques democrátiques que s’asitien na Xunta Xeneral (Partíu Popular, Convocatoria por Asturies, Podemos y Foro Asturies)”, cumpliendo asina col llabor tutelar de l’ALLA. “Ye especialmente trescendente, nesti sen y pola so importancia simbólica, la visita que fexo a l’Academia’l Ministru de Cultura del Gobiernu d’España’l 21 de febreru pasáu porque, al facer reconocencia de la institución llingüística, el gobiernu del Estáu taba faciendo, al empar, reconocencia de la nuesa realidá llingüística y cultural”.

La “empresa científica máis importante y de máis altura das que lleva alantre a institución”, señaló que ye la ellaboración del DEN, el Diccionario Normativo del Eonaviego, del que s’encarga la Secretaría Llingüística del Navia-Eo. D’igual forma, citó’l Congresu Mundial de Cultura Asturiana de febreru del 2025, nel que tán trabayando á comuña l’ALLA, el Gobiernu y la Universidá d’Uviéu en comuña, como “un acontecimientu académicu ensin precedentes n’Asturies”.

Política llingüística

“L’Academia considera, en fin, que fai’l so llabor con procuru, pero nós nun facemos la política llingüística, anque sí tengamos l’enfotu de ser un axente facilitador de la mesma. Y Asturies necesita con urxencia una política llingüística, según la opinión de nueso, en dos niveles”, arrancó González Riaño’l bloque últimu del so discursu. El primer nivel al que se refirió foi a “nivel macro, esplorando, de contino y día a día, toles posibilidaes de consensu políticu al rodiu del cumplimientu constitucional del artículu 3.2, esto ye, la oficialidá”.

“Nesi sen, l’esfuerzu per parte del Gobiernu d’Asturies tien qu’empobinar, necesariamente, a la busca del alcuerdu col centru-derecha que representa’l Partíu Popular d’Asturies, pero esti partíu tamién tien que dar pasos claros na direición de sopelexar qué oficialidá necesitamos p’acabar con una escepcionalidá constitucional inasumible en términos políticos y democráticos. Ye más, y afondando no anterior, l’Academia considera que nun hai xustificación dala pa nun intentar el llogru d’alcuerdos nesta mesma llexislatura”, rescampló.

“Pero la política llingüística tamién tien de facese efeutiva a un nivel micro”, siguió, “esto ye, de mou cotidianu y perceutible y plantegada acordies cola marcación llegal que va dende les disposiciones europees hasta les autonómiques, pasando peles estatales”. Apuntó’l bon recibimientu que tuvo per parte de los interllocutores políticos el documentu ‘Exes básiques y dalgunes consideraciones pal diseñu d’un Plan de Dignificación y Usu del Asturianu’ y emponderó les ‘Instrucciones relatives a los criterios llingüísticos pa usar nel ámbitu de l’Alministración del Principáu d’Asturies y el so sector públicu’, “un pasu importante en política llingüística, pero, llueu de meses d’aición del Gobiernu, ye un pasu abondo curtiu en rellación coles necesidaes d’Asturies nesti tarrén”.

Nesti puntu señaló “qu’inda nun sabemos cuándo se va facer públicu y efeutivu’l Plan de Normalización del que se dio anuncia al entamar la llexislatura. Y ye que pasen los meses y entama a espardese’l nerviosismu y, lo que ye más preocupante, dalguna deceición, ente los sectores sociales más comprometíos cola defensa de los nuesos derechos llingüísticos y culturales”.

Porque los tiempos “nun puen esperdiciase”. “Conceyu Bable entamó va 50 años; l’autonomía y l’estatutu tienen fecha de mil novecientos ochenta y ún; la política llingüística, coincidente col aniciu de la escolarización, cumple 40 años. ¿Puede pidísenos que sigamos siendo pacientes? ¿Hai daquién que lleve aguantando lo que nós?”, entrugóse González Riaño, que finó col poema d’Andrés Solar ‘Hai que siguir’: “Munches gracies a toes y a toos. Nós, de xuru, vamos siguir”.

Documental y actuación d’Héctor Braga

L’actu nun contó cola habitual llectura de poemes de la revista ‘Lliteratura’, qu’algama’l so númberu 40, sinón que se proyeutó’l documental breve ‘Xorrecíes tán les manes. Mediu sieglu de Conceyu Bable na perspeutiva de l’Academia de la Llingua Asturiana’, estrenáu’l 14 de marzu na xornada dedicada a esti coleutivu pola ALLA pol so cincuentenu aniversariu. Depués xubiría al escenariu Héctor Braga pa ufrir al públicu una esbilla del so espectáculu nuevu, ‘Rabil’.

El músicu llangreanu interpretaría ‘Caricós’, ‘Vaqueira’, ‘Trés besos’, ‘Cantar del penitente, la estrenada güei mesmo ‘Valiente’ y ‘Llobatu’. “Ye un momentu que voi guardar tola vida”, aseguró sobre la so actuación nel Día de les Lletres Asturianes enantes de finar con un “l’asturianu vive, la llucha sigue”.

Terminaría l’actu cola interpretación del himnu nacional per parte del gaiteru Eduardo Llosa y glayíos de ‘¡oficialidá!’ ente’l públicu.

Personalidaes

Barbón tuvo acompañáu nel actu por Juan Cofiño, presidente de la Xunta Xeneral; la conseyera de Cultura, Política Llingüística y Deporte, Ana Vanessa Gutiérrez; la conseyera d’Educación, Lydia Espina; y el direutor xeneral d’Aición Cultural y Normalización Llingüística, Antón García. Unos palcos a la so izquierda taba sentáu’l presidente popular Queipo colos diputaos Beatriz Polledo y José Luis Costillas.

Taríen representaos nel Campoamor tolos grupos parllamentarios, a esceición de VOX. Per parte de Convocatoria por Asturies acudió Xabel Vegas y pel mestu Adrián Pumares (Foro) y Cova Tomé (eleuta por Podemos) xunto con Xune Elipe. Pel PSOE, mentes, acudieron tamién Noelia Macías y Mónica Ronderos, amás del eurodiputáu Jonás Fernández Álvarez y la senadora María Fernández Álvarez.

El direutor xeneral de Consumu, Faustino Zapico, d’Izquierda Asturiana (IAS), sería otra de les autoridaes presente, ente les qu’había trés alcaldes, dos socialistes, Cecilia Pérez Sánchez (El Franco) y Xosé Ramón Martín Ardines (Samartín del Rei Aurelio), y ún d’Izquierda Xunida (IX), Manuel Ángel Álvarez Álvarez (Mieres), asina como dellos conceyales. D’otros partíos hebo asistencia d’Aína, Verdes-EQUO y Podemos, col so coordinador autonómicu, Diego Ruiz de la Peña, al frente.

Tamién hebo una representación de primer nivel del ámbitu sindical, académicu y civil. Rescampló nesta edición la presencia de Verònica Cantó, presidenta de Acadèmia Valenciana de la Llengua, a la que González Riaño dedicó un saludu.

Na semeya, un momentu de la intervención de González Riaño.