González Riaño asistió como convidáu al Congresu del PP

El PP cursó una invitación institucional a l’Academia de la Llingua Asturiana (ALLA) p’acudir al XVIII Congreso Autonómico del partíu, nel que se proclamó a Álvaro Queipo presidente. “Da anuncia d’otros posibles contactos a nivel más formal”, diz Xosé Antón González Riaño.

"Foi una invitación institucional nun clima de normalidá, de respetu y de consideración institucional", espresó a Asturies.com el presidente de l'ALLA, presente'l sábadu nel Palaciu d’Esposiciones y Congresos Ciudá d’Oviedo/Uviéu. Una carta firmada por Beatriz Llaneza, presidenta del Comité Organizador, a instancies del propiu Queipo dio pie a l’asistencia de González Riaño a la clausura del Congreso Autonómico en representación de la institución académica.

“Da anuncia d’otros posibles contactos a nivel más formal ente’l Partido Popular y l’Academia de la Llingua Asturiana”, valora’l caderalgu de la Universidá d’Uviéu, que considera que “per primer vegada nel PP hai un lideralgu renováu, xeneracionalmente distintu a los lideralgos anteriores, con una persona que tien una gran formación política y una gran formación académica, que s’asitia na Asturies rural, na Asturies rural occidental, y polo tanto ta en contactu cola cultura y cola llingua popular, y dende esi puntu de vista seguramente la so posición con respecto a la cuestión llingüística tien de ser muncho más receptiva”.

Nun escaez González Riaño que “la demanda de l’Academia ye qu’esa receptividá o esa sensibilidá se faiga plenamente constitucional, reconociendo lo que pasó nel restu de comunidaes autónomes, que ye que’l PP siempre participó nel consensu sobre la oficialidá en toles llingües que son oficiales nes comunidaes autónomes. Nesi sentíu, n’Asturies nun pue pasar otra cosa diferente; sería una esceicionalidá difícilmente xustificable, y más a estes altures”.

Na semeya, Queipo, presidente nuevu del PP d'Asturies, agradez l'apoyu recibíu al final del Congresu.