González Peñas va ocupar esti 2017 la vicepresidencia del grupu GUE/NGL nel Parllamentu Européu

La europarllamentaria asturiana de Podemos Tania González Peñas va ocupar mientres tol 2017 la vicepresidencia del grupu GUE/NLG, del que tamién formen parte La Izquierda Plural y Los Pueblos Deciden, coalición liderada por EH BIldu na que participaba Andecha Astur. L'avilesina va llevar asuntos d’igualdá de xéneru.

“Dende esta vicepresidencia queremos proponer un proyeutu de Xunión Europea basáu nel respetu a los Derechos Humanos, la democracia y el bienestar social”, sostién González Peñas, que va ocupar el cargu esti añu pa da-y pasu nel 2018 a Marina Albiol, de La Izquierda Plural, coalición liderada por Izquierda Xunida. “Llevo tiempu trabayando polos derechos de les muyeres nel Parllamentu Européu con propuestes rellacionaes cola dignificación del trabayu domésticu y de cuidaos, la equiparación de los permisos de paternidá o la llucha contra la brecha de xéneru nes pensiones. Dende esta función nueva estos asuntos van siguir siendo una prioridá xunto con otros como la recuperación de los derechos sociales y los servicios públicos”, añadió.

Gauche Unitaire Européenne/Nordic Green Left (GUE/NGL), esto ye, Izquierda Xunitaria Europea pol so acrónimu en francés y Izquierda Verde Nórdica polo mesmo n’inglés, ta formada por 52 eurodiputaos de 14 estaos, entes los que tán Podemos, cola tamién asturiana Estefanía Torres; La Izquierda Plural, cola castrillonense Ángela Vallina; y Los Pueblos Deciden. Nesta última coalición, que tien como representante únicu a Josu Juaristi (EH Bildu), participó Andecha Astur. La presidencia ocúpala l’alemana Gabi Zimmer, de Die Linke (La Izquierda).