La empresaria González Espinedo garra la presidencia de la Casa de Asturias en México

América González Espinedo, fía d’emigrantes exiliaos nel 1939, resultó escoyida como presidenta de la Casa de Asturias, institución nacida n’Acapulco y con sede anguaño en México DF. D’esta forma, conviértese na primer muyer en dirixir un centru asturianu nel país norteamericanu.

Orixinaria de Técpan de Galeana, nel estáu de Guerrero, González Espinedo pasó parte de la so infancia cola so güela en Bo, onde llegó con 6 años, pa tornar dos años depués a México xunto colos sos proxenitores. El so padre fora presu políticu mientras la Guerra Civil nel campu de concentración de Cotlliure (Roselló) y viaxara depués a Acapulco, onde sacaría alantre xunto cola so muyer l’hostal ‘Amueblados Cantábrico’. Cola fin de tener una meyor educación pa les dos sos fíes –América tendría otru hermanu, que morrió al pocu de nacer–, la so madre desplazóse al DF y matricularía a les pequeñes nel Colegio Madrid, una escuela d’exiliaos españoles.

Tres finar los sos estudios, la presidenta pa los dos próximos años d’esti centru asturianu casóse con un llaniscu col que tuvo dos fíes, Jessica y América, que-y dieron un total de cinco nietos. Dende’l 1964, González Espinedo sufre esclerosis múltiple, enfermedá que-y afeutó la motricidá de dambes manes, anque non el so amor por Asturies y por caltener les tradiciones del país en México. Agora, dende’l so cargu nuevu na Casa de Asturias de Acapulco, esta empresaria tien la intención abrir un centru de día p’adultos mayores, proyeutu qu’ella mesma quier dirixir xunto con Aída Pérez y Victoria López Jarillo, y ayudar a aquellos paisanos que requieran ayudes individuales y orientación, pa lo que cuenta col sofitu del Conseyu de Comunidaes Asturianes.

Na semeya, González Espinedo (nel centru) nun actu na Casa de Asturias de Acapulco.