Goleada de campeonatu

Gran partíu'l disputáu ayeri nel Tartiere por un Uviéu que nunca nun tuvo rival nel Samartín y al que yá goleaba nuna primer media hora de xuegu d'una intensidá mui perriba de lo normal y que-y sirvió al Uviéu pa proclamase campeón d'iviernu.

Salió'l Real Uviéu con gran movilidá por parte de tolos sos xugadores y con mui bona distribución de xuegu, amás d'una presión constante. Ambición y bon xuegu que-y permitióal equipu disponer d'abondes ocasiones de gol que Rubén, Darío (por dos vegaes) y Ballester supieron aprovechar nuna primera parte impecable. Cuatro goles perguapos que foron imparables p'Alberto. El partíu acabó equí por mor de la relaxación uvieína y la inoperancia del Samartín.

Na segunda parte siguió la superioridá azul que quedó rematada con un gol de Cervero dempués d'una gran xugada de Rubén y Caco Morán. Rivas permitió'l descansu y l'aplausu del públicu a tres de los meyores xugadores del partíu: Michu, Darío y Jon Carrera. Mencionar les dos espulsiones, tan absurdes como xustes, que sobraron nun partíu con xuegu mui llimpiu en tou momentu. Foi'l meyor partíu d'un Uviéu qu'encara la segunda vuelta con gran optimismu consciente de la gran calidá y fondura d'un banquillu que tien de permitir algamar l'únicu oxetivu d'esta campaña: l'ascensu de categoría.