Gobiernu, Defensa y Conceyu d'Uviéu roblen un protocolu sobre La Vega mui criticáu

|
Adrián Barbón, Margarita Robles y Alfredo Canteli robla protocolu La Vega

Esti sábadu ta convocada una concentración en contra del proyeutu y en defensa del caltenimientu del patrimoniu y d'un usu de les instalaciones en beneficiu de la ciudadanía.

Adrián Barbón, presidente d'Asturies, y Alfredo Canteli, alcalde d'Uviéu, desplazáronse a Madrid pa firmar xunto cola ministra de Defensa, Margarita Robles, el protocolu xeneral d'actuación pa la reordenación urbanística y puesta en valor de los terrenos de la fábrica d'armes de La Vega. Ésta va llevar al valtu de los xalés del recintu y d'otres instalaciones pa la construcción de vivienda nueva y un edificiu singular n'altura, al trazáu de l'autopista Y pel interior, espaciu pa equipamientos culturales y un usu científicu y teunolóxicu de la nave de cañones, de lo que se va encargar el Gobiernu.

La importante dedicación del espaciu pa pisos, cálculase unos 100.000 metros cuadraos d'edificabilidá en 15.000 metros cuadraos, de lo que se va beneficiar Defensa, ye la principal crítica de los opositores a esti proyeutu xunto cola perda d'elementos patrimoniales. La demanda ciudadana ye destinar esta instalación pal beneficiu de la ciudá y como motor cultural y económicu.

Somos y Foro yá amosaron la so disconformidá col proyeutu alcordáu pa La Vega y la ciudadanía convoca pa mañana una concentración contra la operación. Va ser al meudía na entrada pela cai Marcelino Fernández.

Na imaxe, Barbón, Robles y Canteli firmen el protocolu. Semeya obra d'Armando Álvarez.

Contador Estadistiques