Gobiernu asturianu y empreses d’informática dan-y un emburrión al software llibre

El Gobiernu asturianu y 30 empreses d'informática asturianes presentaron ayeri'l primer desarrollu del so entornu d'aplicaciones informátiques basaes en programación de códigu abiertu, un sistema nel que distintos programadores puen axustar y facer cambeos sobre los distintos programes informáticos, una concepción que se conoz como "software llibre" n'oposición al "software propietariu" nel que namás una empresa o programador particulares tienen derechu a acceder al códigu de los programes, un sistema nel que se desarrollen por poner un casu les aplicaciones de la casa Microsoft.

Anque'l desarrollu d'aplicaciones en software llibre figuraba como ún de los puntos del alcuerdu de gobiernu ente PSOE y IX-BA, foi'l procesu de trespaso de competencies de titularidá estatal el qu'obligó a desarrollalu, al alcontrase l'alministración asturiana obligada a trabayar con un garapiellu d'aplicaciones informátiques de procedencies mui distintes, esactamente 476 que funcionaben sobre 22 entornos de programación distintos.

Pa igualar toes estes aplicaciones y afayar el trabayu de les distintes estayes de l'alministración el Gobiernu presentó ayeri los primeros deesarrollos del entornu de desarrollu asturianu en códigu abiertu o "FrameWork" del Principáu d'Asturies (FW-PA nes sos sigles) que va funcionar baxo l'estándar J2EE, un sistema que va permitir mayor conexón ente los distintos programes).

La primer versión del El FW-PA terminóse n'agostu del 2004, entamando entós el desarrollu de les aplicaciones o programes que diben funcionar dientro d'esta plataforma. 30 empreses asturianes del sector de les Nueves Tecnoloxíes participaron nel procesu, nel que se dio prioridá a la contratación d'universitarios asturianos.

Ente les primeres aplicaciones desarrollaes baxo l'entornu FW-PA ta'l programa "Pastos WEB" d'asignación de pastos comunales, aplicaciones pa pidir autorizaciones pa la corta de madera y pa quemar, pa la solicitú d'ayudes agraries al traviés de bancos y caxes d'aforros, l'aplicación de solicitú de visita a la Resrva de Muniel.los, la de solicitú de licencies de caza y pesca, d'avisu de daños por especies protexíes o'l Rexistru d'instaladores eléctricos y boletinos d'enganche a la rede.