Gobiernu asturianu y el PP condenen la llei de consumu d'alcohol como "un ataque a la cultura asturiana"

La Conseyera de Mediu Rural y Pesca Servanda García, declaró que'l Gobiernu asturianu ta redactando alegaciones al anteproyectu de Llei de Prevención del Consumu de Bebíes Alcohóliques que prepara'l Ministeriu de Sanidá y Consumu. Servanda García afirmó que la llei que ta preparándose "afecta a la sidra y va en contra de la cultura tradicional asturiana de consumu de sidra". García entiende que la llei en redacción va más allá del so oxetivu de fomentar un consumu responsable d'alcohol ente la xente mozo" y calificó'l proyectu como "mui difícil de cumplir pa los asturianos".

El borrador que prepara'l Ministeriu de Sanidá pa regular la venta y publicidá de les bebíes alcohóliques tamién llevó les crítiques del Partíu Popular Asturianu. El lider de los populares, Ovidio Sánchez, aconceyó ayeri en Nava colos llagareros de la Comarca de la Sidra pa conocer la so opinión sobre esta llei. En términos asemeyaos a los de la Conseyera, el representante popular aseguró que "incluyir la sidra na categoría de bebíes alcohóliques diba ser una agresión pa la cultura asturiana".