Gaspar Llamazares defende “un tratamientu meyor pal asturianu” nel Estatutu d’Autonomía

El secretariu Xeneral d'Izquierda Xunida Gaspar Llamazares pasó ayeri pelos micrófonos de la emisora SER Xixón, onde fizo una entrevista cola periodista Guillermina Caso. La xefa d'informativos de la emisora entrugó-y al líder d'IX si la oficialidá del asturianu na reforma estatutaria diba ser irrenunciable pa la so formación, a lo que Llamazares retrucó que "l'asturianu tien qu'apaecer nel estatutu y tien que tener un tratamientu meyor del que tien agora". El representante d'Izquierda Xunida nun faló d'oficialidá como daqué irrenunciable, safándose de dar una rempuesta directa a la entruga de la periodista, pero concretó les sos aspiraciones en "dir más allá de l'actual llei de normalización pa evitar que desapaeza una parte tan importante de la nuestra cultura y patrimoniu".

En rellación tamién a la cuestión de la reforma del estatutu d'autonomía d'Asturies, Llamazares llamentó l'actitú del PP, que pretende que la reforma se retarde, en cuantes qu'ello "supón quedase atrás" y "en cuenta de ser vanguardía y facer propuestes propies supón que vamos a recibir y trabayar sobre les propuestes que vengan d'otros llugares".

Gaspar Llamazares fizo un llamáu a que se ficiere una reforma del estatutu dende una perspectiva asturiana y esplicó que "les reformes d'estatutu valen pa encarar coses nueves y pa tratar asuntos que lleven tiempu pendientes. L'asturianu ye una d'eses coses que ta pendiente y qu'hai que tratar".