Gascona vive una selmana dedicada a la sidra d’escoyeta

Dende'l llunes y hasta’l vienres, el 'boulevard' uviedín de la sidra va vivir les Xornaes X Aniversariu de la Sidra d’Escoyeta. Los aficionaos van poder disfrutar nos chigres de Gascona d’esta bébora con certificáu de calidá y de la gastronomía asturiana.
 
L’actu inaugural de les xornaes foi la presentación de la collecha del 2010 de la sidra d’escoyeta, nel que tuvieron presentes chigreros, aficionaos y los propietarios de Trabanco, Peñón, Foncueva y Muñiz, los cuatro llagares que faen esta sidra que s’ellabora con venti variedaes de mazana autóctona. La collecha d’esti añu destaca por rescatar pal mercáu la primer sidra del añu, ensin trasegar, tres l’ésitu que tuvo l’añu anterior.
 
A la hora de la xinta, les persones que s’averaron a Gascona yá pudieron prebar les cazuelines que tán a disposición de los veceros xunto con una botella de sidra d’escoyeta pol preciu de 3 euros. Una iniciativa novedosa n’Uviéu que de xuru va tener una bona acoyida pola calidá y variedá de los productos presentaos polos chigres d’esta cai. Asina, en Tierra Astur vamos poder disfrutar de calamares guisaos na so tinta con sidra de Trabanco; na Asturias, frixuelu rellenu de mariscu (Peñón); en La Noceda, calamares, gambes y xampiñones (Foncueva); en la Villaviciosa, daos de paletiella ibérica al estilu sidrería Villaviciosa (Muñiz); en La Pumarada, sollombu ibéricu en salsa de setes monteses (Trabanco y Muñiz); y n’El Pigüeña, chipirón caramelizáu a la sidra (Foncueva y Peñón).
 
Nestos díes, tamién van celebrase tasties guiaes de baldre que van principiar mañana, a les 20 hores en La Pumarada, con sidra d’escoyeta. El miércoles van continuares estes tasties con dos sesiones, a les 19 hores, en La Noceda, con sidra del llagar Foncueva; y a les 20 hores, na Asturias, con Peñón. El xueves ye’l turnu de la sidrería Villaviciosa, a les 19 hores, con Muñiz; y de Tierra Astur, a les 20 hores, con Trabanco. El Pigüeña va zarrar el vienres esta actividá a les 19 hores con sidra d'escoyeta. Estes actividaes van tener una númberu máximu de 25 participantes, qu’han d’apuntase nos chigres citaos.
 
Pero quiciabes el mayor aliciente d’estes xornaes ye la posibilidá de ser ún de los 50 privilexaos que van poder realizar el I Tour de la Sidre d’Escoyeta. Tolos díes van sortease pases VIP ente los clientes de Gascona pa vivir una xornada temática alredor de la sidra qu’inclúi visites a les pumaraes de Trabanco, Peñón, Foncueva y Muñiz, un taller sobre la ellaboración de sidra, tasties guiaes y clases d’aniciación al escanciáu, ente otres actividaes. Por cada botella de sidra, los veceros van recibir una papeleta pa participar nel sortéu de places pa esti evento que va celebrase nel mes de mayu.