Garzón: "Vamos siguir calteniendo la reivindicación de la oficialidá del asturianu"

El candidatu d'Unidad Popular a la presidencia del Estáu comprometióse cola oficialidá de asturianu. Foi nun alcuentru cola mocedá asturiano celebráu esti sábadu n'Uviéu.

Acompañau por Manuel González Orviz, el cabezaleru de la llista d'Unidad Popular n'Asturies, plataforma na que participa Izquierda Xunida (IX) y Izquierda Asturiana (IAS), Alberto Garzón respondió entrugues de los presentes sobre economía, feminismu, ecoloxía o la organización del Estáu, ente otros asuntos. Víctor Suárez, coordinador de la estaya Faciendo País d'IX, preguntó al candidatu "¿cómo dende Unidad Popular se va tratar la diversidá llingüística del Estáu y tamién la nacional?.

La respuesta de Garzón foi una defensa d'un Estáu federal "consciente de les realidaes nacionales qu'esisten nel nuestru Estáu, que tien que ser respetuosu con elles y al empar promoveles, por eso vamos siguir calteniendo la reivindicación de la oficialidá del asturianu". "El pueblu asturianu tien el derechu a tener como llingua oficial l'asturianu pa poder tresmitir a toles xeneraciones non sólo yá una llingua, sinón una cultura y una forma d'entender la sociedá", añadió.

Tres la intervención, los presentes glayaron el yá clásicu 'Yá, yá, yá, oficialidá'.