García pide que’l Conseyu de Llingües Cooficiales cuente con Asturies y l’usu de la toponimia por parte del Estáu

|
Antón García xunta telemática Ministeriu de Política Territorial y Función Pública

El direutor xeneral de Política Llingüística, Antón García, aconceyó de manera telemática con dos representantes del Ministeriu de Política Territorial y Función Pública. Na xunta demandó la incorporación d’Asturies a les xuntes del Conseyu de Llingües Cooficiales y l’usu por parte del Estáu de la toponimia oficial.

Violeta Tomás, subdirectora xeneral de Cooperación Autonómica, y Ana María de la Fuente, de la Oficina de les Llingües Oficiales del ministeriu, foron les interllocutores con García nel alcuentru celebráu na tarde d’ayeri. L’escritor espunxo los avances fechos pol Gobiernu en materia de política llingüística y solicitó la presencia d’Asturies nes xuntes del Conseyu de Llingües Cooficiales magar l’asturianu y el gallego-asturiano nun tengan la consideración d’idiomes oficiales, asina como en toles actividaes que s’entamen dende’l mesmu.

Esti organismu creáu nel 2007 dedícase al análisis, l’impulsu y la coordinación de la política de l’Alministración Xeneral del Estáu en rellación col usu de les llingües oficiales de les comunidaes autónomes col oxetivo de procurar una meyor atención a los derechos llingüísticos de los ciudadanos. Ente los sos llabores destaca el 'Informe de Diagnósticu sobre'l Grau de Cumplimientu del Usu de les Llingües Cooficiales na Alministración Xeneral del Estáu' fechu nel 2019.

García trató otros munchos asuntos coles responsables del ministeriu, enfotándose sobre manera na necesidá de que l’Estáu entamé a usar la toponimia tradicional del país, la única oficial anguaño en 66 de los 78 conceyos asturianos.

Contador Estadistiques