García Cortina y Alicia González nun finaron la carrera en Yorkshire

Unos problemes estomacales impidieron al xixonés lluchar pol Mundial de Ciclismu.

El sábadu, na xornada previa, nun había bones sensaciones dientro del combináu de Pascual Momparler. Iván García Cortina, la otra baza d'España tres Alejandro Valverde, nun s'atopaba al cien por cien de cara a la carrera d'ayeri.

"Empecé con problemes estomacales y anque tratamos de remedialo nun diba a meyor", esplicaba tres retirase de la prueba elite de los Mundiales de Ciclismu en Carretera de Yorkshire, llamentando "desaprovechar un percorríu como ésti y con esta climatoloxía que me presta". L'agua, como tola selmana, nun faltó na prueba masculina, obligando a recortar el circuitu programáu por esti condáu inglés, nel que terminó siendo'l más rápidu'l danés Mads Pedersen tres llegar a meta encabezando un grupu de trés ciclistes conformáu tamién pol italianu Matteo Trentin y el suizu Stefan Kung.

Tampoco tuvo suerte Alicia González el sábadu na prueba elite femenina, que terminaría abandonando tres quedar descolgada del pelotón. La vencedora foi la neerlandesa Aneemiek van Vleuten con 2 minutos y quince segundos de ventaya sobre la so compatriota Anna van der Breggen, siendo bronce l'australiana Amanda Spratt.