García Arias presenta la Gramática Histórica del Asturianu

Yá ta a la venta la Gramática Histórica de la Lengua Asturiana de Xosé Lluis García Arias. Esta obra reproduz, n´esencia, la primer estaya del testu de la Contribución a la Gramática Histórica de la Lengua Asturiana y a la Caracterización Etimológica de su Léxico, asoleyada en 1988 pola Universidá d´Uviéu y que llevaba tiempu estrincada nes llibreríes. Nesta segunda versión, el profesor de la Universidá d'Uviéu y ex presidente de l´Academia de la Llingua Asturiana, Xosé Lluis García Arias, allarga enforma la primera, na exemplificación y conteníos, faciendo un bon exerciciu p´afitar l´étimu na fonte documental emplegada.

La obra entama con una curtia descripción de la fala pa fixase llueu nos aspeutos evolutivos, fónicos y fonolóxicos, de más calter. Recuéyense tamién los dos capítulos de morfosintaxis histórica, dedicaos al casu y al artículu, yá amestaos na primera edición. Enanchamos esta faza cola semeya d´un artículu d´hai unos años onde se caracteriza la llingua medieval escrita. Cuenta asina´l llector gracies a esti llibru con una ferramienta amañosa pa facese una idea más xeneral de la hestoria de la llingua. Como colofón al llibru qu´agora s´asoleya otra vuelta, inxerse una amestadura, lóxicamente tamién de tipu hestóricu, cola qu´emprimaba en 1994 la primera edición de l´Academia de la Llingua Asturiana del Fueru Xulgu, un de los más importantes testos medievales asturianos.

Dau´l bayurosu material manexáu pol autor, del vieyu llibru de 1988 allúmase namás nesta edición la primera faza, la empobinada dafechu a la gramática histórica; la segunda, nel so día, inxertará l´estudiu etimolóxicu del léxicu, que s´aguarda con impaciencia --xunta´l tamién anunciáu Diccionariu etimolóxicu de la llingua asturiana--, pola insuperada consideranza de la que goza profesor García Arias como etimólogu, non sólo dientro d´Asturies sinón tamién a nivel internacional, como demuestra, ente otros munchos reconocimientos, el fechu de ser el filólogu d´ámbitu hispánicu escoyíu p´abordar la reedición d´una nueva versión del Diccionariu etimolóxicu románicu de Meyer-Lübke.

La presente edición de la Gramática Histórica de la Lengua Asturiana tamién permeyora la primera gracies al llabor inimaxinablemente llargu de Pilar Fidalgo Pravia, nos aspeutos téunicos, índices y na cartografía (el presente volume remátase con 32 mapes llingüísticos). Tamién ye deldora de Xosé Miguel Suárez, bon conocedor del gallego-asturianu, y d´Héctor Xil, especialista de les fales del occidente de Lleón.

La Gramática Histórica de la llingua Asturiana ye una de les novedaes del mes na tienda asturiana na rede, Asturshop, au pue mercase al traviés de tarxeta de créditu o tamién per contra-reembolsu.