García nun pronostica si s'usará la llingua nos Premios Príncipe

El periodista, ex director de la Fundación Príncipe d'Asturies y de la revista Asturias Semanal, Graciano García, nun fai pronósticu de si nun futuru va llegar a incluyise la llingua asturiana na ceremonia d'entrega de los Premios Príncipe.

Sicasí, pero que "yá hai señes bien clares que yá se ficieron". Al respecto, destacó "los xestos d'amparu" del príncipe, Felipe de Borbón, cola cultura y la llingua asturianes.
     
En declaraciones a Europa Press, refirióse a esti asuntu, n'ocasión del so nomamientu como patronu d'honor de la Fundación Caveda y Nava, que trabaya pola normalización del asturianu, dende la concordia y l'entendimientu institucional.
  
Preguntáu pola posibilidá de que la Fundación llegue a utilizar n'alguna parte de la ceremonia d'entrega la llingua asturiana, respondió: "nun pueo faer pronósticos de lo que pue asoceder nel futuru, pero hai unes señes bien clares que se ficieron". "La Fundación procuró siempre facer les coses al so debíu tiempu y cuando tán madures, nun dir por atayos, nin con oportunismos, sinón facer les coses con rigor y con seriedá", añadió
  
Los xestos del Príncipe
Aprovechó pa destacar que'l Príncipe "tuvo xestos bien claros d'amparu de la nuesa cultura y específicamente de la nuesa llingua". "N'alguna ocasión", reseñó, "n'actos d'entrega del Pueblu Exemplar, y n'otros actos importantes, lleó partes del so discursu na nuesa llingua".
  
Asina, recordó la entrega del premiu del Pueblu Exemplar a l'asociación maliayesa d'Amigos del Paisaxe, Cubera, en 1991 en Valdediós, onde "el Príncipe dedicó unes palabres en bable". Tamién recordó que "recibió n'audiencies a xente que ta defendiendo y afalando al cultivu del nuesu patrimoniu llingüísticu".
  
Mostróse "honráu por esta distinción d'un grupu de persones que promueven, al traviés de la cultura y la llingua asturiana, l'entendimientu y la concordia".
  
Llabor pol asturianu
Coles mesmes, recordó que vien "dende hai muncho tiempu contribuyendo a esta defensa, dende cuando yera director de la revista Asturias Semanal, onde reivindicamos y defendimos nun momentu bien importante, en plena transición, en tiempos difíciles, estes idees, y poneles al altor del tiempu en que vivíamos".
  
Nesti sen, recordó los problemes que supunxo l'usu del 'Asturies Patria Quería' na primer ceremonia de los premios, en 1980, de forma oficial, cuando tovía'l tema nun taba establecíu como himnu de la comunidá. "Muncha xente mostró les sos reticencies porque dicíen que yera un cantar de borrachos", comentó.
  
Sobre’l futuru de la llingua
Sobre la situación de la llingua asturiana, considera que "tamos nun momentu de transición y de reflexón, pero lo que se semó ta ehí y ta bien vivu". "Hai un fondu bien sólidu", añadió.
  
Si bien entiende que "Asturies nel terrenu llingüísticu tien zones diferenciaes, y ensamar too eso y ponelo al altor del nuesu tiempu ye un procesu llargu", mostróse "optimista sobre'l futuru d'esta parte del nuesu patrimoniu cultural".