García de la Cuesta va participar n’Irún nunes xornaes sobre la música popular na época de la romanización

El músicu y investigador xixonés Daniel García de la Cuesta va participar nes X Xornaes de Música Popular ‘La música de los romanos y aquellos vascones’. Éstes van celebrase nel Oiasso Erromatar Museoa d’Irún los díes 15 y 16 de xunetu.
 
García de la Cuesta va viaxar a Gipuzkoa convidáu poles entidaes Herri Musikaren Txokoa, Herri Musika Zaleak y el propiu muséu romanu Oiasso pa presentar el so trabayu ‘Posible usu d’instrumentación musical nel norte peninsular n’época de romanización’. Va ser el vienres, día 15, a les 10 hores nuna charra na que tamién van intervenir miembros del grupu Ludi Scaenici, que van falar sobre’l ‘Spettacolo e Ricerca Sulla Musica e la Danza Nell’antica Roma’, y Juan Mari Beltran, cola so intervención ‘Garai hartako inguru honetako balizko hotsak’.
 
Esi mesmu día, a les 16 hores, tres una comida nel muséu, va celebrase una mesa redonda-taller sonre ‘La música de los romanos y aquellos vascones’, que da títulu a les xornaes, pa continuar l’actividá’l sábadu, a les 11 hores, con un taller impartíu por músicos de Ludi Scaenici que lleva’l nome de ‘La música y los instrumentos de los romanos’. Pa finalizar estes actividaes, va celebrase un conciertu a les 20 hores con Oiassoko Baskoiak y Ludi Scaenici y una cena popular posterior nes mines d’Arditurrri.