García Arias: "Llamentablemente la RTPA nun se fixo pa normalizar la llingua asturiana"

Xosé Lluis García Arias tuvo presente como públicu na mesa redonda sobre la TPA que se celebró na UABRA. "Nun pue sorprendenos que nun tea faciendo un llabor de normalización. Lo raro sedría que lo fixera", aseguró sobre l'ente públicu.

Nesta mesa redonda sobre televisión y llingua asturiana na que participaron los periodistes asturianos Carlos Suari y Próspero Morán, asina como'l director de rellaciones institucionales de la RTPA, Antonio Virgili, tamién tomó la pallabra García Arias tres conocer les opiniones de los trés convidaos pola Universidá Asturiana de Branu (UABRA). L'ex presidente de l'Academia de la Llingua Asturiana (ALLA) tuvo una intervención mui celebrada pol públicu y, tres l'actu, faló con Asturies.com sobre la so visión de la RTPA.
 
Según García Arias, "la TPA nun ta fecha pa que se normalice la llingua asturiana, polo que nun pue sorprendenos que nun lo tea faciendo. Lo raro sedría que lo fixera". El caderalgu comentó tamién que la visión que da la TPA d'Asturies ye ayena a la realidá del país y punxo como exemplu la información del tiempu en comparanza con les televisiones gallega o madrileña.
 
Nel trescursu de la mesa redonda, Morán y Suari quexáronse del tratu que tien la llingua asturiana nes emisiones de la TPA y pidieron un aumentu de la presencia de la llingua. Pel so llau, Virgili amosó'l so compromisu cola llingua, pero defendió la falta d'emisiones n'asturianu d'informativos o programes deportivos porque según la so visión, l'audiencia probablemente sedría más baxa n'asturianu y la RTPA ye un ente públicu que tien la obligación d'optimizar los sos recursos y aportar a la mayor cantidá de xente que seya quien.
 
Pel so llau, Xosé Antón González Riaño, responsable del programa de formación de la UABRA, que fixo de moderador, agradeció-y la so presencia a Virgili y rescampló la bona rellación  y la collaboración qu'esiste ente l'Academia de la Llingua Asturiana y l'ente públicu de comunicación.