Galicia celebra’l patrón con pautu de gobiernu nuevu

Galicia celebra güei 25 de xunetu'l Día de Santiago. La fiesta nacional de los nuestros vecinos coincide cola robla del alcuerdu de gobiernu de gobiernu conxuntu ente PSDG-PSOE y BNG pol que va mandase l'executivu gallegu d'equí a la vuelta de cuatro años.

La fiesta nacional gallega, que vien del cultu a los restos del apóstol qu'instaurare'l monarca asturianu Alfonso II nel sieglu IX, celébrase güei marcada entovía pla transición de gobiernu. L'executivu entovía en funciones del PP participa güei en dellos actos oficiales, anque non na ofrenda al apóstol, que tradicionalmente facía Manuel Fraga y qu'agora va facer l'alcalde de Santiago. D'otra parte, les fuerces del gobiernu que ta en trance de formase celebren actos independientemente, col BNG convocando una manifestación en Compostela en sofitu a la so propuesta d'estatutu d'autonomía pa Galicia y col PSOE celebrando en Rianxo l'homenaxe a Castelao. La xornada, d'otra manera, vien marcada pol ataque con bomba a un caxeru automáticu en Santiago esti fin de selmana, una acción que la Delegación de Gobiernu en Galicia venceya al resurdimientu de grupos independentistes que tan acabante de dar un "saltu cualitativu"

Anque entovía ensin acceder al poder, PSOE y BNG yá tienen firmáu'l pautu pol que va mandase la so acción de gobiernu, un pautu que'l líder socialista Emilio Pérez Touriño definió l'alcuerdu como un documentu pa devolvé-yos el "protagonismu políticu a los ciudadanos" mientres que pal líder del BNG Anxo Quintana, el pautu ha suponer "un contratu colos ciudadanos" que permita "que se respete a Galicia como país". Nes sos 39 fueyes, el documentu, redactáu en gallegu, respuende a munches reivindicaciones del nacionalismu gallegu, ente elles que se reconoza Galicia como país, ello xunta otres midíes revolucionaries como la paridá de sexos nes llistes electorales. En materia llingüística, el pautu pide que l'alministración gallega se mande del gallegu como llingua preferencial y ratifica l'apueste pol "galego exterior" que se fexere nel Plan de Normalización Llingüística gallegu del 2004, un plan que sacó angüeñes en bien de sectores del asturianismu por defender una iniciativa política gallega en materia cultural y llingüística sobre "territorios que pertenecen alministrativamente a Asturies".


La influyencia que la formación del nuevu executivu gallegu pueda tener nel occidente asturianu ye'l tema de debate en Conceyu Abiertu
. L'Alcuerdu de Gobiernu pa Galicia pue consultase íntegru na web de La Voz de Galicia