Gales, espeyu p'Asturies

La visita a Asturies del Ministru británicu pal País de Gales ye bona escusa pa echar una güeyada a esti país que guarda abondos paralelismos económicos, históricos y xeográficos con Asturies, anque en delles estayes paez l'alumnu aventayáu.

Antiguu reinu medieval enxertu na Corona Británica, Gales convirtiose nun país mineru y industrial que sufrió una crisis semeyante a la asturiana, anque la economía galesa ta saliendo d'ella aprovechando d'una manera intelixente los sos recursos. En cuenta de dexalo too al aldu del "turismu rural" Gales emplega la so especifidá cultural pa potenciar el turismu gracies a los sos recursos patrimoniales materiales y inmateriales, ufiertándose tamién como plató de cine. El país tamién apostó por les nueves tecnoloxíes, desarrollando en serio
posibilidaes como'l comerciu electrónicu, pa lo qu'aprovechó los mesmos fondos que-y da la UE a Asturies como "rexón obxetivu 1"

Otramiente l'idioma galés, que vivió un procesu de desaniciu semeyante al del asturianu, recuperose decididamente gracies al trabayu de Cymdeithas, la organización qu'encadarmó nos años 60 una dinámica de resistencia civil con fuertes campañes como la d'insumisión fiscal coles qu'acabaron consiguiendo un estatus pal idioma galés que dende llueu nun tien l'asturianu. D'otra parte, la recuperación idiomática galesa enxértase nun ampliu movimientu políticu y social bien interesante de conocer.

En rellación con Gales hai que dar anuncia tamién del conciertu que dan esta tarde en Xixón los Gorki's Zigotic Minci, ún de los grupos galeses de pop más importantes de los 90.