Galán atrévese con un poemariu con 'Tierra podre'

La Casa del Libro, en Xixón, acueye esti sábadu la presentación de 'Tierra podre', primer poemariu del periodista y escritor Inaciu Galán. La obra edítala Ediciones Camelot y ta yá la venta nes principales llibreríes d'Asturies.

'Tierra Podre' ye un poemariu dixebráu en cinco estayes temátiques qu’encadarmen el llibru y organicen los poemes acordies con temes que s’enrriestren dándo-y un filu de continuidá. La obra percuerre los requexos de la memoria familiar, les obsesiones vitales venceyaes a espacios físicos y a les distintes realizaciones de la lluz.

Amás, toca temes venceyaos a la muerte, les despidíes o la vuelta al pasáu, xunto a otros poemes más identitarios que mos tresporten a paisaxes o falen del sentimientu de pertenencia a la tierra. Hai tamién espaciu pa pieces poétiques que s’averen al erotismu, a lo efímero de la vida o a la fraxilidá de les vivencies y les alcordances.

Galán va presentar el llibru a les 20 hores d'esta tarde nun actu nel que va tar acompañáu pol escritor Andrés Astur Treceño y l'editor Pablo Solares.