Gadafi pierde’l control de delles ciudaes importantes de Libia

Misurata, Zuara, Al Sawiya, Benghazi, Derna y Tobruk son dalgunes de les ciudaes importantes de Libia nes que los opositores de Gadafi tomaron el control nes hores últimes. El vienres ta convocada una manifestación en Trípoli.  
 
Según informaciones de la cadena de televisión árabe Al Jazeera, en Misurata los opositores tomaron les riendes col apoyu de los efectivos militares ellí esplegaos, qu'emitieron un comunicáu, fechu públicu per Internet, nel qu'espresen el so apoyu a la población. De la mesma forma, en Tobruk, Suleiman Mahmoud, el xeneral al mandu nesta ciudá, anunció'l cambiu de llealtaes de les tropes al so cargu. “Tamos del lláu del pueblu. Antes tábamos con él –por Gadafi–, pero la situación cambió: ye un tiranu”, esplicó. Mentes, Benghazi, la segunda ciudá del país, desfíxose del control gubernamental y agora ta en manes de comités populares.
 
Pese a la situación na que ta Libia, Muamar Gadafi ta tratando de facese fuerte en Trípoli, la capital, onde mañana ta convocada una manifestación pa imitar la revuelta d’Exiptu. El númberu de muertos dende qu’entamó’l llevantamientu contra’l militar libiu podría llegar a los 10.000, según fontes del Tribunal Penal Internacional. Gadafi namái reconoz 300.