Gabriele Yacoub y Marta Topferova, actuaciones destacaes

Gabriel Yacoub, que-y echa'l piesllu al ciclu Música del sieglu XX, qu'organiza la Obra Social y Cultural de Caxastur y la cantante checa Marta Topferova son dos actuaciones musicales destacaes pal día de güei.

Nel casu de Gabriel Yacoub, qu'actúa por primera ocasión n'Asturies, el cantante francés va presentar nel Centru Caxastur d'Uviéu a partir de les 8 de la tarde los temes de "Je Vois venir" un doble discu en directo que resume la trayectoria d'esti míticu cantautor folk francés. Pa facese una idega de la so importancia, val con dicir que la carrera de Yacoub entamó nos 70 tocando col arpista Alan Stivell pa crear dempués una de les bandes fundacionales del folk contemporáneu como foi el grupu Malicorne, grupu que dexó nel cume de la so popularidá pa entamar una carrera en solitario que llega hasta güei con cinco discos. Yannick Hardouin col baxu, el piano y la voz y Gilles Chabenat cola zanfona acompañen al artista nel so conciertu de güei.

No tocante a Marta Topferova, la cantante checa va tocar a la mesma hora pero nel Antiguu Institutu de Xixón presentando'l so discu La Marea (Harmonia Mundi). Nacida en Paraga, Marta Topferova diose a conocer yá de neña cantando en coros locales, emplegando'l so rexistru vocal nes llingües más distintes, casu del español, francés, rusu, finés y checu, y tamién nos estilos musicales más estremaos, dende'l jazz a la música clásica. Sicasí, yá dende los quince años, ye la música de Cuba y Sudamérica la que más-y llama l'atención, siendola so inspiración artistes como Paco de Lucía, Mercedes Sosa, Atahualpa Yupanqui, Joao Gilberto, Jobim, Vinicius da Moraes o Elíades Ochoa los sos favoritos, amestando a la fin nes sos composiciones influyencies musicales americanes, flamenques y del folclor centroeuropéu nun estilu propiu que nun casa con nenguna etiqueta que se-y quiera poner.