Gabino de Lorenzo torna a presidir un Plenu tres 27 ausencies

L’alcalde d’Uviéu, Gabino de Lorenzo, acudió esti llunes a un Plenu municipal tres 27 sesiones ensin asisitir. El primer edil nun pasó desapercibíu y enfrentóse a la oposición: “Xuró-yos que van aguantame años enteros”, señaló.
 
Amás, De Lorenzo aseguró que “voi dar prioridá a la mio asistencia a los plenos porque ye mui entretenío”. Les reacciones que xeneró la so presencia curtia nel Plenu –a los pocos minutos abandonó la sala por “compromisos inherentes”– tres 14 meses de ausencies reiteraes, llevó a l'alcalde a llamentar “muncho” ser “el protagonista” del debate municipal al considerar que se trata de “una perda de tiempu pa los uviedinos”. “Falando de les mios ausencies nel Plenu nun s'igüen los problemes de los uviedinos”, reprochó-y a la vocera del PSOE, Paloma Sainz.
 
L'alcalde cargó tamién contra'l presidente de la Unión de Consumidores d'Asturies, Dacio Alonso, al qu'acusó de “vivir de les sovenciones socialistes”. Mentes, Roberto Sánchez Ramos ‘Rivi’, conceyal de l’Asamblea de Ciudadanos por la Izquierda, formación qu’abandona pa encabezar la candidatura d’Izquierda Xunida-Los Verdes d’Asturies a l’alcaldía, protagonizó dellos enfrentamientos dialéuticos con De Lorenzo y tuvo qu’aguantar desprecios como “¿Usté y yo vamos disputamos dalgún votu? Na vida”.