Gabino de Lorenzo refuga presentase pola Presidencia d’Asturies

L'Alcalde d'Uviéu, el popular Gabino de Lorenzo, ún de los nomes que sonaben pa encabezar la llista del PP nes elecciones autonómiques del 2007, declaró esti fin de selmana que refugaba presentase de primeru de llista pol PP y que namás tenía intención de repetir como alcalde d'Uviéu.


Les declaraciones de Gabino de Lorenzo, que l'alcalde carbayón fexo n'esclusiva al diariu La Nueva España, recoyíen tamién el sofitu del alcalde d'Uviéu a la figura d'Ovidio Sánchez como candidatu popular nel 2007, ello en medio de la polémica dientro del PP cola entrada en xuegu d'un grupu de militantes populares que tan pañando firmes pa que'l candidatu del PP nel 2007 sía'l diputáu Juan Morales. Gabino de Lorenzo opina tamién nel diariu uvieín sobre la hipotética vuelta de Francisco Álvarez Cascos pa dirixir la candidatura popular. Pa Gabino de Lorenzo, Cascos diba ser un candidatu válidu, pero asegura que l'ex - ministru ta retiráu de la política y que nun va querer presentase.