Gabino de Lorenzo diz qu'hai qu'estudiar inglés y asturianu

L'alcalde d'Uviéu Gabino de Lorenzo Ferrera, declaró esta mañana na firma d'un conveniu ente'l Gobiernu asturianu y el Conceyu d'Uviéu que la oposición "inglés versus bable" que propunxere l'economista y Premiu Príncipe d'Asturies de Ciencies Sociales Juan Velarde ye "un error" y que la rellación ente dambes llingües tendría de ser "inglés y bable".

El rexidor uvieín sofitó la defensa del asturianu como parte de la cultura y les tradiciones asturianes. Anque aclariando que con ello un quería dicir que tuviere al favor de la oficialidá, de Lorenzo dixo que "El bable ye la nuestra cultura y les nuestres tradiciones. Si nun les defendemos nosotros, ¿quién va facelo?". De Lorenzo, que dixo que la situación tien tola traza de que d'equí a la vuelta poco se fale gallegu o catalán en toa España, esplicó que l'usu de la llingua autóctona nun tendría de llevar a enfrentamientu y que tenía qu'haber unanimidá nel so usu porque "si los asturianos nun miramos pa les coses nuestres nun va facelo naide." Pal alcalde d'Uviéu "Hai que lluchar polo nuestro, que nun ye defender la oficialidá, pero nun pue ser que cada vegada que dalguién fala de la cultura y tradiciones asturianes ello sía motivu d'enfrentamientu"

Gabino de Lorenzo defendió'l so derechu apromocionar l'asturianu al traviés de concursos y actos públicos y el del conseyeru Valledor, que participaba con elli nel actu, a vestir el traxe tradicional del país ensin ser por ello motivu de chancia pa naide. Pa Gabino de Lorenzo defender la cultura y la llingua asturianes nun ye barbaridá nenguna y ello "nun tien que ver col inglés"