Fundación Príncipe d'Asturies y Gobiernu asturianu piesllen la polémica pol Centru Niemeyer

Un conveniu va coordinar la collaboración ente Fundación Príncipe d'Asturies y gobiernu asturianu na xestión y conteníos del "Centru Cultural Niemeyer" que yá nun ye oficialmente'l "Muséu de los Premios Príncipe d'Asturies" pero nel que sí que la Fundación va tener un papel importante. Fundación Príncipe d'Asturies y Gobiernu asturianu pesllaron la polémica que se vive n'Asturies alredor d'esti equipamientu cultural.

El patronatu de la Fundación Príncipe d'Asturies diz que sofita'l proyectu de Centru Cultural qu'empobina'l Gobiernu asturianu y recuerda que, dempués de qu'a últimos del 2005 l'arquitectu brasileñu Óscar Niemeyer-y ufiertare' proyectu pal futuru "Muséu de los Premios" a la Fundación, esta, en viendo que'l proyectu perpasaba la so capacidá, decidió treslladá-y la iniciativa al Gobiernu asturianu, que foi'l que lu desarrolló y definió de magar entós p'acá. La Fundación ofrézse a collaborar nel desarrollu del proyectu y de los conteníos del mesmu al traviés d'un conveniu, pero recuerda que'l "Centru Cultural Niemeyer" yá nun ye oficialmente'l "Muséu de los Premios Príncipe d'Asturies" ello poco dempués de que'l presidente asturianu Vicente Álvarez Areces identificare dambos conceptos nuna entrevista a la cadena SER. De cualquier manera, la FPA nun fai referencia nenguna a les declaraciones del Alcalde d'Uviéu Gabino de Lorenzo, qu'esixó la construcción del muséu de los Premios na ciudá onde s'entreguen.

La Conseyera de Cultura Ana Rosa Migoya emitió darréu de la declaración de la Fundación una valoración oficial na que se congraciaba del sofitu de la FPA al Centru Niemeyer y na qu'aseguraba que Gobiernu asturianu y Fundación nunca s'estremaron sobre esti proyectu, que definió como "un gran Centru Cultural con una serie d'equipamientos que van apurrir munchísimes actividaes y, ente elles, un gran centru espositivu que va esparder y promocionar los altos valores de los Premios Príncipe d'Asturies".