Fumíos sospechosos na Térmica d’Aboño

El Grupu Ecoloxistes n'Acción d'Asturies emitió un comunicáu de prensa esti fin de selmana alertando de la suelta pela chimenea del Grupu 1 de la térmica d'Aboño, en Xixón, d'unes emisiones de fumos que nun se correspuenden coles normales.


Según esplicaron dende Ecoloxistes n'Acción nna mañana delpasáu vienres 29 el grupu 1 de la central térmica d'Aboño (Xixón) llibró a l'atmósfera una gran cantidá de fumu contaminante que, seguramente poles condiciones atmosfériques, nun foi a remontar y acabó posando sobre tola redolada de la central, emporcando'l Valle d'Aboño. El grupu ecoloxista, qu'aporta la semeya qu'acompaña esta información como preba documental, punxo al corriente de la situación al Serviciu de Xestión Ambiental de la Conseyería de Mediu Ambiente del Principáu d'Asturies.


El grupu I de la Térmica d'aboño, inauguráu nel añu 1972, ye de los más antiguos d'Asturies. La térmica d'Aboño ye propiedá de la empresa Hidroeléctrica del Cantábrico, titular tamién de los grupos térmicos del conceyu de Ribera, que l'añu pasáu protagonizaron un episodiu de contaminación al salir pela chimenea del Grupu I de Ribera una gran cantidá de fumu, povisa y carbón pulverizao ensin quemar qu'emporcó los praos de la redolada. Un particular llegó a denunciar el casu énte'l Seprona, anque la denuncia quedó archivada.