Fueyo afirma que quier potenciar l’asturianu n’Educación Infantil

La direutora de Política Llingüística, Ana María Fueyo, confirmó la intención del PSOE de potenciar l’asturianu n’Infantil. Nuna reunión cola XDLA, la conseyera d'Educación, Cultura y Deporte, Ana González, yá se mostrara receptiva nesti aspeutu.

Fueyo señaló na inauguración de la Exfiastur 2012 –esposición filatélica– nel Centru de Cultura Antiguu Institutu de Xixón qu’esiste demanda d’enseñu de Llingua Asturiana nos centros escolares, pa lo que punxo d’exemplu la incorporación de la materia a cuatro colexos más nel occidente del país. Amás, anunció que quier potenciar esa enseñanza en tolos ciclos educativos, inclusive n’Infantil, tal como comunicara la conseyera d’Educación, Cultura y Deporte, Ana González, a representantes de la Xunta pola Defensa de la Llingua Asturiana (XDLA) nun conceyu tres reclamar éstos la inclusión de la materia nel currículu d’esti ciclu educativu, yá que nestos momentos el Gobiernu ta trabayando na so ellaboración. Sicasí, estes declaraciones choquen coles denuncies que vien recibiendo la organización cívica sobre torgues en dellos institutos del país al enseñu del asturianu en Secundaria.

No que respeuta’l profesoráu de Llingua Asturiana, indicó que yá tán tolos maestros nos sos puestos de trabayu, salvo dalguna esceición. Por último, destacó que la normalización del asturianu ha de pasar por dellos ámbitos, como pue ser una presencia "mayor, muncho más nidia y contundente" nos medios de comunicación, l’enseñanza, la toponimia, les espublizaciones o los cantares.