Fuelga nel metal

Anque Aceralia suel ser noticia nos medios polos sos bonos resultaos o pola so importancia dientru del grupu multinacional Arcelor, esta selmana la empresa siderúrxica dio anuncia del entamu d´un espediente de regulación d´emplegu pa 6.000 trabayadores del total de 7.500 que tien la compañía asturiana. Lo más significativo ye que ye la primer regulación d´empléu na historia d´Aceralia. Los 1.500 trabayadores d´Aceralia que nun entren nesta regulación son profesionales de mantenimientu imprescindibles pa les factoríes. Esto supón dexar de producir sobre 13.000 tonelaes d´aceru per díi, polo que la producción va treslladase a otres fábriques del Grupu Arcelor. Según datos de la empresa, Arcelor saca de les fábriques asturianess el 47% de los 9,6 millones de tonelaes d'aceru que produz al añu, lo que multiplicao por diez díes de fuelga son 130.000 tonelaes



Esti fechu ye consecuencia de la fuelga de los trabayadores de les empreses subcontrataes y ausiliares d´Aceralia, que reclamen una xuba salarial que-yos dexe los sueldos al altor de los de los sos compañeros d´Aceralia. La fuelga, qu'afecta a más de 60 empreses del sector de montaxes, -casique'l sector enteru- ente elles delles del volume de Montrasa o'l grupu avilesín Daniel Alonso, garró fuercia abondo ente los trabayadores hasta´l puntu de tener paralizáu al sector metalúrxicu, industria señera nel país. Depués de dos fases del paru, una de tres díes y la otra de cinco, un tercer paru de 10 díes forzó a Arcelor a decretar una regulación d'emplegu nes factories d´Aceralia d'Avilés y Xixón qu'afecta a ente 5.550 y 5.800 obreros. El paru de les contrates del metal, que fae los llabores más duros na producción metalúrxica, demostró la dependencia que tien el xigante Arcelor d'estes empreses, con un marcu llaboral muncho peor que'l de los trabayadores de l'antigua Ensidesa y que s'encarguen de trabayos como'l tresporte, mantenimientu, la retirada del arrabio de les poces de los fornos y dacuando hasta de les grues de la fábrica.



Mentantu los sindicatos UXT, CC.OO y USO alcordaron esti llunes pasáu xunta la patronal Femetal d´entamar otra vegada más les conversaciones sobre´l polémicu conveniu que ta nel noyu del problema. Les discrepancies alrodiu´l problemáticu conveniu ye´l orixe de que´l 80% del sector d´empreses ausiliares y montaxes tean paralizaes. La cuestión ye que los sindicatos piden una xuba salarial d´ente un 30% y un 25% a lo llargo de 4 años. A la contra la patronal solo ufierta una xuba del 12%. Amás d´esto los sindicatos tamién revindiquen el remocique de les plantilles al traviés del contratu-relevu y una meyora n´aplicación de la Llei de Riesgos Llaborales.