Francisco Baragaño (USO) empondera la necesidá de reconocer la oficialidá del asturianu na reforma estatutaria

El coordinador d'Izquierda Xunida Jesús Iglesias y el dirixente del Bloque por Asturies Rafael Palacios presentáron-y ayeri al secretariu xeneral de la Unión Sindical Obrera (USO) Francisco Baragaño, la propuesta de reforma estatutaria p'Asturies que defenden estes dos fuerces dientro de la ronda de contactos que ta faciendo IX-BA pa dar a conocer esti documentu, que yá conocen CCOO y UXT y que va presentase nes próximes selmanes a SUATEA, CSI y la patronal FADE.

Iglesias, que definió la situación política d'Asturies como dalgo "atípico y ensin nengún referente n'España" llamentó qu'otres comunidaes tean pesllando los sos procesos de reforma estatutaria mientres Asturies vive condenada a nun tener estatutu nuevu, en refrencia a la negativa del PP a participar nel procesu, dalgo que-y abulta grave sobremanera a Iglesias en cuantes qu'España ta faciendo nesti tiempu una rellectura de la so Constitución hacia postures más federalistes.

El dirixente del Bloque por Asturies Rafael Palacios definió la reforma estatutaria como'l procesu pol qu'había facese una "constitución p'Asturies" que la iguale en derechos a otres comunidaes y llamentó nesti sentíu la valoración y perspectives qu'aporta pa la reforma l'informe del Conseyu Consultivu sobre la reforma estatutaria, que-y abulta más propiu d'una etapa "predemocrática y preautonómica" qu'amas concueya puntu por puntu coles tesis del PSOE.

El dirixente d'Unión Sindical Obrera (USO) Francisco Baragaño fizo tamién una valoiración positiva sobre la necesidá de reformar l'estatutu asturianu y centróse especialmente na cuestión de la oficialidá del asturianu, que dixo qu'ha valir como "elementu de cohexón y non de distorsión" asegurando que la oficialidá del asturianu "nun había ser un debate esteril"