Francisco Álvarez-Cascos nun gana apoyos a la so propuesta d’un “gobiernu de concentración”

Francisco Álvarez-Cascos zarró esti xueves la ronda de contautos colos llíderes d’otres fuercies. Jesús Iglesias (IX-LV) foi’l caberu en reunise col candidatu de FAC, que nun atopa apoyos a la so propuesta d’un “gobiernu de concentración”.
 
El llíder de Foro Asturias Ciudadano (FAC) repitió que la intención del so partíu ye la d’algamar un alcuerdu “con tolos interlocutores penriba de consideraciones programátiques” qu'en dellos casos nun pue valorar, anque hai tiempu que ta intentando conocer esi programa pa poder midir coincidencies o discrepancies. “Nun pue haber un alcuerdu ensin un programa de gobiernu, porque ye dalgo elemental; y en segundu llugar, un alcuerdu pasa per compartir árees de gobiernu”, dixo Álvarez-Cascos, qu'añadió qu'esi alcuerdu “portaría la posibilidá de participación del restu de fuercies polítiques”. Sicasí, na ronda d’entrevistes colos candidatos de los otros partíos, Álvarez-Cascos nun nun llogró apoyos esplícitos a la so ufierta pa formar un gobiernu “lo más ampliu posible”.
 
Nesti sen, Jesús Iglesias refugó cualisquier pautu de gobiernu ente dambes fuercies y consideró que nestos momentos lo más probable ye “o un gobiernu de dereches o un gobiernu en minoría de Foro Asturias”. El presidente de FAC volvió esponer, nesti casu a Jesús Iglesias, “colos mesmos términos”, los escenarios que contemplen con posibilidá de llegar a pautos parllamentarios, de llexislatura o de gobiernu, y insistió en que “van calcar hasta depués del últimu momentu” en llegar a alcuerdos con toles fuercies polítiques porque, al so xuiciu, requierlo la situación nacional. “Nun voi dexar d'intentalo hasta l'últimu minutu porque esa fórmula –un gobiernu de concentración– ye meyor qu'un gobiernu monocolor y merecería la pena esplorala”, dixo Álvarez-Cascos, que volvió referise a los Pautos de la Moncloa. “Cuanto más ampliu sía’l Gobiernu, meyor p'Asturies”, insistió.
 
Otra manera, sobre l’alcuerdu parllamentariu, el ex ministru de Fomentu recordó que de nun haber alcuerdu de naide con naide, pola aritmética parllamentaria de los cinco puestos de la Mesa de la Xunta, Foro Asturias tendría dos miembros, un vicepresidente y un secretariu y el PSOE otros dos. “Hai un quintu puestu, que sería hasta la presidencia de la Mesa, que ta abiertu a los alcuerdos o decisiones que voten los demás porque nun ta asignáu a nadie”, señaló Álvarez-Cascos, qu'añadió que ye un escenariu “políticamente bien importante que nun pue inorase”.