Francia en guerra por Canal+

En Francia, les elecciones dexen sitiu nes portaes de los periódicos a lo que la prensa gala ye un escándalu nacional. Ello nun ye otro que la cayida de la directiva histórica del xigante audiovisual Canal+, encabezada por Pierre Lescure. El nuevu presidente ye Jean-Marie Messier, director executivu de Vivendi-Universal, empresa cola que la canal de pagu se fusionare en 2000. Lescure, que tien el sofitu del ex-ministru de cultura Jorge Semprún, diz que va lluchar por recuperar el cargu que-y quitó Vivendi escusándose en que C+ tuvo l'añu pasáu un resultáu negativu de 500 millones d'euros, una perda causada por una canal de satélite italiana que ye la única oveya negra del grupu dientro d'un exerciciu bastante curiosu.La xente que trabaya na empresa teme pol so puestu y pola continuidá de los proyectos de la empresa, y la llegada de Messier interpretáronla ayeri como una amenaza. Aparte de que se piensa que C+ va facese una canal más conservadora, la entrada de la xente de Vivendi-Universal siéntese tamién como una perda de soberanía francesa énte'l sociu americanu. Nesti sentíu, nun ta de más remembrar que C+ ye la mayor productora de cine n'Europa nun momentu en que la industria americana intenta per tolos medios monopolizar el mercáu. El periódicu francés Liberatión, que tien un estoyu mui grande d'artículos sobre la tema, yá anduvo buscando reacciones en Hollywood. Pela so parte, Le Monde destaca'l fechu de que'l cambiu de directiva y la manera en que se fizo criticáronse tanto dende la izquierda como dende la derecha.