Fraga, radioactivu

Asturies podría tener un vecín radioactivu si Manuel Fraga acaba tomando en serio les sos propies palabres del otru día nes que defendía la instalación d'una central nuclear en Galicia. Fraga vieno asina a sofitar les declaraciones de la Comisaria Europea Loyola de Palacio, que lleva dende que llegó al cargu faciendo campaña a favor de qu'Europa vuelva a construyir centrales nucleares. Dientro de Galicia y tamién n'Asturies tan faciédose declaraciones a la escontra de la hipótetica nuclear gallega, que ye en realidá un proyectu vieyu d'Unión Fenosa del añu 1974 que quedó pa prau d'aquella. Pela so parte, el conseyeru de Mediu Ambiente Herminio Sastre yá dixo qu'Asturies ta contra la retirada de la moratoria nuclear de 1995.Anque l'asuntu seya bastante seriu, el personaxe de Fraga tien una rellación colo nuclear que nun dexa de ser un puntu graciosa. Depués del famosu bañu que dio na playa de Palomares (na semeya), onde un avión americanu soltó una bomba atómica, pa demostrar que nun había peligru nengún, Fraga vuelve agora a la carga defendiendo la nuclear y provocando. La so frase d'ayeri "Quien s'opón a la enerxía nuclear ye un dinosauriu prehistóricu" pronunciada tres el conceyu del xuráu del Premiu Prícipe d'Asturies del que forma parte, nun pue entendese dende más clave que la de la socarronería.

Contador Estadistiques