Fraga considera que la reacción de Cascos ye "llamentable"

El senador y presidente fundador del Partíu Popular, Manuel Fraga, aseguró que nun-y presta "nada" la reacción que tuvo l'ex ministru Francisco Álvarez Cascos tres escluyilu como cabeza de llista del PP por Asturies.

"Esta reacción ye llamentable", manifestó l'ex presidente de la Xunta a la so llegada a la xunta del Comité Executivu Nacional del PP, qu'axunta a la plana mayor del partíu, na madrilana cai Génova. "Llamentable pero nun lo entiendo", insistió.
  
Pela so parte, el presidente del PP n'Asturies, Ovidio Sánchez, afirmó que nun se fizo "nada mal" nesti procesu de designación del númberu 1 pol partíu n'Asturies. Añadió que se trata de decisiones de la dirección estatal que'l PP asturianu respeta.
 
Esperanza Aguirre
Per otru llau, la presidenta de la Comunidá de Madrid, Esperanza Aguirre, aseguró que-y paez "llamentable" que'l PP pierda al ex ministru de Fomentu Francisco Álvarez Cascos, y manifestó que "algo" fadríen "mal" toos, tanto'l partíu como l'afectáu.
  
"Nesti momentu, la realidá ye qu'a mi paezme llamentable que perdamos a Álvarez Cascos. Algo fairíamos mal mal toos, el partíu y él, y podrá iguase", sorrayó nuna entrevista concedida a Telecinco, recoyida por Europa Press.
  
La dirixente española recordó que l'ex secretariu xeneral del PP pidió un Congresu estraordinariu n'Asturies pa escoyer al que sería candidatu pa les elecciones autonómiques de mayu, algo que, dixo, "nun se consideró oportuno facelo".