Foro señala que’l compromisu de González sobre la especialidá d’asturianu dexa munches incógnites

|

Manuel Peña, voceru d’Educación, Cultura y Deporte de Foro, afirma que l’anunciu de la conseyera Ana González sobre la especialidá d’asturianu dexa munches incógnites. Reclama a la socialista qu'esplique lo que quier facer al respeuto.
 
“Defende una postura sobre la enseñanza del asturianu que ye contradictoria colo qu'hasta agora punxo en práctica'l PSOE", destaca Peña, en rellación a l’anunciu fechu por González na inauguración de la Universidá Asturiana de Branu (UABRA), de qu'el so departamentu va regularizar la situación del asturianu y de los sos docentes en Primaria y Secundaria. El voceru del partíu de Francisco Álvarez-Cascos en materia educativa manifestó que "nos congratulamos de qu'agora siga la sienda marcada por Foro en política llingüística, si ye verdá que va retomar la oportunidá que desaprovechó nel so día'l Gobiernu d'Areces, y nun se trata d'un anunciu fechu a cencielles por quedar bien nel contestu nel que lo fixo".
 
L'anunciu de la onseyera, sicasí, asegura'l diputáu de Foru, "presenta tovía munches incógnites, tanto nos sos aspectos formales, yá que nun vieno acompañáu d'un calendariu de plazos y actuaciones, como nel so conteníu". Peña considera que González tien que precisar si va dase continuidá a la iniciativa tomada pol Gobiernu de Foro pa crear una especialidá de llingua asturiana y una plantiya docente propia nes enseñances non universitaries d'alcuerdu colo previstu nel informe encargáu pola Dirección Xeneral de Política Llingüística anterior a los profesores Leopoldo Tolivar y Míriam Cueto. "Nun tema tan complexu y con tantes víes posibles d'aplicar una política llingüística, lo mínimo que se debe esixir a la conseyería ye qu'esplique de forma clara qué quier faer. Y esto ye lo qu'inda tamos esperando d'Ana González", acabó.

Contador Estadistiques