Foro pide “escuses” por votar nel Senáu en contra d’una partida pa l’Academia de la Llingua Asturiana

|

La senadora Rosa Domínguez de Posada, de Foro, calificó de “error” la votación en contra d’una partida de los Presupuestos Xenerales del Estáu pa l’Academia de la Llingua Asturiana (ALLA) y pidió “escuses” por ello. Esta enmienda a les cuentes aprobaes nel Congresu taba dientro d’un bloque xunto con delles otres.

“Cola fin d’esclariar les coses”, indicó Domínguez de Posada, “quiero dexar nidio qu’anguaño defendo la llingua nes mesmas condiciones y col mesmu compromisu que’l día qu’asumimos énte notariu’l documentu programáticu de defensa del nuesu patrimoniu en xeneral y, polo tanto, el llingüísticu”. Según argumentó, nel Senáu les enmiendes "nun se debatieron nel Plenu, sólo na Comisión de Presupuestos, na que Foro nun tien representación. El presidente de la Comisión de Presupuestos, al comienzu de la sesión nel Senáu, lleó’l dictame de la Comisión, desestimando toles enmiendes, y darréu votáronse en bloque unes 49 enmiendas de Compromís, ente les que taba la de la llingua”.

La representante de Foro nun citó les otres dos enmiendes que solicitaben una cantidá de 100.000 euros pa la financiación de l’Academia de la Llingua Asturiana (ALLA), que presentaron PSOE y Xuníos Podemos-En Comú-En Marea. PP, Foro, Ciudadanos, Coalición Canaria, UPN y PNV votaron en contra a toles enmiendes presentaes a los Presupuestos nel Senáu pa evitar asina qu’éstos tuvieren que devolver les cuentes al Congresu.

“Nun hai contradicciones”

Pese al error, Domínguez de Posada asegura que “nun hai contradicciones. Hai unanimidá en Foro respeuto de la llingua, que forma parte del nuesu patrimoniu cultural, y siguimos calteniendo’l compromisu con ella llamando al consensu ente tolos grupos políticos; y dende esi posicionamientu, dende la calma y la normalidá, ye como se pue avanzar na utilización y conservación del nuesu patrimoniu llingüísticu”. “Creo que n’Asturies hai exemplos, como Xixón, de qu’ensin aspavientos nin radicalismos tán faciéndose coses importantes pa la continuidáu y apreciu a la llingua pola nuesa sociedá”, concluyó.

Contador Estadistiques