Foro de Ciudadanos, primer partíu asturianu que consigue representación nel Congresu

Con 92.549 votos (14,75 por cientu), Foro de Ciudadanos, formación lliderada por Francisco Álvarez-Cascos, consigue un escañu nel Congresu. El PP gana n’Asturies, anque suma namái 3 diputaos, los mesmos que’l PSOE. IX algama ún.
 
Col 100 por cien de los votos contabilizaos, el PP conviértese na formación más votada nel país al rexistrar 222.179 apoyos (35,41 por cientu), anque pierde 67.126 votos en comparanza colos resultaos del 2008, cuando consiguió 4 escaños (41,58 por cientu). Nesta ocasión queda con 3, al igual que’l PSOE, que sufre una sangría mayor que los populares: pasa de tener 326.477 (46,93 por cientu) votos hai trés años a recibir 183.170 (29,18 por cientu), lo que supón 143.307 apoyos menos.
 
Foro de Ciudadanos, marca cola que Foro Asturias Ciudadano se presentaba a estes eleiciones, consiguió un diputáu nel Congresu, el primeru de la historia d’un partíu asturianu en democracia, tres sumar 92.549 votos (14,75 por cientu). Sicasí, estos resultaos son insuficientes pa les aspiraciones de Francisco Álvarez-Cascos, que pretendía formar grupu parllamentariu propiu, pa lo que necesitaba 5. En Madrid, la formación catalogada de rexonalista quedó lloñe d’algamar representación, yá que recibió 6.608 apoyos (0,19 por cientu) col 99,81 por cientu de los votos contabilizaos.
 
Pela so parte, Izquierda Xunida consiguió recuperar un diputáu por Asturies tres dos eleiciones xenerales en blanco. La coalición pasa de los 49.936 votos (7,18 por cientu) del 2008, cuando participó xunto col Bloque por Asturies y Los Verdes d’Asturies, a 83.312 (13,27 por cientu) d’esti domingu, lo que supón 33.376 apoyos más.
 
D’esta forma, los parllamentarios asturianos nel Congresu pa los cuatro años próximos van ser Mercedes Fernández (PP), Ovidio Sánchez (PP), María del Carmen Rodríguez Maniega (PP), Antonio Trevín (PSOE), María Luisa Carcedo (PSOE), Mariví Monteserín (PSOE), Enrique Álvarez Sostres (Foro) y Gaspar Llamazares (IX).
 
Andecha pierde 223 votos
 
Andecha Astur, única formación asturianista que se presentaba a estes eleiciones, foi la décima fuercia más votada, con 1.076 apoyos, lo que supón un 0,17 por cientu del total. Unos resultaos asemeyaos a los del 2008, cuando rexistró 1.299 votos (0,19 por cientu), anque nesta ocasión tamién participaron el Bloque por Asturies y Unidá (848 votos).
 
UPyD nun pudo conseguir representación pese a doblar el númberu de votos en comparanza con hai trés años: 24.583 (3,91 por cientu) polos 9.484 (1,36 por cientu) del 2008. Mentes, Equo foi la sesta formación más votada al recibir 3.998 apoyos (0,63 por cientu).
 
El restu de formaciones recibieron los resultaos siguientes: Escaños en blanco, 2.520 votos (0,40 por cientu); PACMA, 2.155 (0,34 por cientu); PCPE, 1.184 (0,18 por cientu); Hartos.org, 859 (0,13 por cientu); PUM+J, 365 (0,05 por cientu); PDYC, 297 (0,04 por cientu); SAIn, 274 (0,4 por cientu); Partido Humanista, 270 (0,04 por cientu); y Unificación Comunista de España, 204 (0,03 por cientu).