Foro critica'l refugu de 17.000 euros n'ayudes a centros asturianos

El Gobiernu respuende qu'incrementó un 25 por cientu les partíes destinaes a actividaes a les comunidaes asturianes nel esterior.

Pedro Leal presentó'l llunes delles iniciatives na Xunta Xeneral pa conocer les causes que llevaron a la Conseyería de Presidencia y Participación Ciudadana a refugar subvenciones por importe superior a 17.000 euros a seis centros asturianos, cinco arxentinos y ún venezolanu. El diputáu de Foro llamentó qu'al Executivu nun-y importe "la preservación de la cultura, les tradiciones, el folclor y la xunión de los asturianos y los sos descendientes na diáspora, la custodia de los sos venceyos con Asturies", ensin escaecer "la promoción d'Asturies nel esterior que se fai dende les comunidaes asturianes”.

La razón del refugu de les subvenciones vieno "por considerar las solicitúes inxustamente fuera de tiempu, pese a que toes elles unviáronse en plazu”, esplicó Leal. El representante de Foro recuerda al presidente Javier Fernández, nesi sen, que nel 2012 los votos procedentes del esterior "que terminaron por facer diputado al mui condenáu ex alcalde de Cuideiru, foron consideraos válidos col matasellos. Si foi válidu entós, cuando primaben los sos intereses partidistes, debería ser válidu agora cuando nos referimos a los intereses de los asturianos del esterior”.

Bases nueves

En respuesta a Leal, Presidencia emitió un comunicáu críticu con Foro, apuntando que "nun foi quien a materializar nin una sola convocatoria d'ayudes a centros mientres l'añu que tuvo al frente del Executivu" nin convocó la Escuela d'Asturianía, el Día de les Lletres Asturianes nel Esterior o'l Conseyu de Comunidaes Asturianes. Nel mesmu asegura, por contra, qu'incrementó "un 25 por cientu les partíes destinaes a l'actividá de los centros asturianos nel 2017" y apunta que ta preparando unes bases nueves de la convocatoria simplificando la documentación que s'ha de presentar.

Sobre'l casu concretu del qu'alerta Foro, señala que "tolos procedimientos de concesión de subvenciones tán reglaos y esixen les mesmas garantíes a toles entidaes qu'opten a les mesmes", apuntando asina que los seis centros asturianos a los que se-yos refugaron les ayudes nun cumplieron colos plazos esixíos